Կանխվել է սպանության նախապատրաստության դեպք. երկու անձ կալանավորվել է

Հայաստանի Հանրապետության քննչական կոմիտեի Կոտայքի մարզային քննչական վարչությունում քննվող քրեական վարույթի նախաքննության ընթացքում առերևույթ փաստական տվյալներ են ձեռք բերվել այն մասին, որ կողմերի միջև ծագած վիճաբանությունից հետո, որն ավարտվել է դանակահարությամբ, Հ.Գ.-ն վրեժխնդիր լինելու նպատակով իր ընկերոջը դրդել է սպանել Ա.Օ.-ին:  

«Մասնավորապես՝ Տ.Մ.-ն ժամանելով Հայաստան, Հ.Գ.-ի հետ նախնական համաձայնությամբ խմբի կազմում, ապօրինի ձեռք է բերել և իր մշտական բնակության վայրում պահել գործարանային արտադրության ակոսափող հրազեն, ակոսափող ինքնաձիգ, ռազմամթերք հանդիսացող փամփուշտներ, մարտական նռնակ: 

Իրենց հանցավոր մտադրությունն իրականացնելու նպատակով Տ.Մ.-ն, Հ.Գ.-ի դրդմամբ, ուղղակի դիտավորությամբ կատարել է Ա.Օ.-ի սպանությանն ուղղված նախապատրաստական գործողություններ, այն է՝ ապօրինաբար իր մոտ պահելով հրազեն, փամփուշտներ և նռնակ, վարձակալել է Ա.Օ.-ին պատկանող տան հարևանությամբ գտնվող առանձնատունը, հետևել վերջինիս տեղաշարժին, կատարել լուսանկարահանումներ, սակայն Ա.Օ.-ն հայտնաբերել է նրան և ընկերների հետ ծեծի ենթարկել: 

Այնուհետև, իրենց հանցավոր մտադրությունն ավարտին հասցնելու նպատակով, Տ.Մ.-ն Հ.Գ.-ի հետ նախնական համաձայնությամբ խմբի կազմում շարունակել են ապօրինի պահել վերոնշյալ առարկաները՝ Ա.Օ.-ին սպանելու հարմար առիթ փնտրելով, սակայն իրենց դիտավորության մեջ ընդգրկված հանցանքն իրենց կամքից անկախ հանգամանքներում չեն կարողացել իրագործել, քանի որ ՆԳՆ աշխատակիցների կողմից կատարված օպերատիվ-հետախուզական, ինչպես նաև քննչական և ապացուցողական մեծածավալ գործողությունների արդյունքում կանխվել է հաշվեհարդար կատարելու մտադրությունը, վերջիններս հայտնաբերվել և ձերբակալվել են»,- «Արմենպրես»-ի փոխանցմամբ՝ մանրամասներ է ներկայացրել Քննչական կոմիտեն :

Կատարված խուզակությունների ընթացքում հայտնաբերվել է նշված զենք-զինամթերքը:

Տ.Մ.-ի նկատմամբ հարուցվել է հանրային քրեական հետապնդում՝ Քրեական օրենսգրքի 43-155-րդ հոդվածի 2-րդ մասի 11-րդ կետով (սպանության նախապատրաստությունը) և 335-րդ հոդվածի 2-րդ մասով (հրազենի, դրա հիմնական բաղկացուցիչ մասերի, ռազմամթերքի և այլ նյութերի, սարքերի, առարկաների ապօրինի շրջանառությունը), Հ.Գ.-ի նկատմամբ՝ 46-43-155-րդ հոդվածի 2-րդ մասի 11-րդ կետով (սպանության նախապատրաստության դրդելը) և 335-րդ հոդվածի 2-րդ մասով (հրազենի, դրա հիմնական բաղկացուցիչ մասերի, ռազմամթերքի և այլ նյութերի, սարքերի, առարկաների ապօրինի շրջանառությունը): 

Վերջիններիս նկատմամբ որպես խափանման միջոց կիրառվել է կալանքը: 

Քրեական վարույթի նախաքննությունը շարունկավում է: 

Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ Քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։