Սևան քաղաքի Շիրազ եւ Գագարին բնակավայրի նույնանուն փողոցներում մեկնարկել են հիմնանորոգման աշխատանքները

Գեղարքունիքի մարզի Սեւան քաղաքում ու Գագարին բնակավայրում ՀՀ կառավարության կողմից 2025 թվականին իրականացվող սուբվենցիոն ծրագրի շրջանակներում մեկնարկել են Սևան քաղաքի Շիրազ եւ Գագարին բնակավայրի նույնանուն փողոցների հիմնանորոգման աշխատանքները: 

«Արմենպրես»-ի թղթակցի հաղորդմամբ՝ այս օրերին Սեւան քաղաքի Շիրազի փողոցում իրականացվում են հողային աշխատանքներ, որին կհաջորդեն ճանապարհային պատվածքի, ուղիների և մուտքերի, մայթերի կառուցումը, դիտահորերի կափարիչների և եզրաքարերի վերատեղադրումը, տեղային լուծումներով ջրահեռացման համակարգի կառուցումը և այլ շինաշխատանքներ:

Սեւանի Շիրազ փողոցի հիմնանորոգումն ընդգրկում է 9995 քմ տարածք: Ծրագրի պայմանագրային արժեքը 180 միլիոն 193 հազար 680 դրամ է, որի 50 տոկոսը հատկացնում է ՀՀ կառավարությունը, 50 տոկոսը` Սեւանի համայնքապետարանը։

Շինարարական աշխատանքներն իրականացվում են «Ճան-Շին» ՍՊԸ կապալառու կազմակերպության կողմից:

Հիշյալ սուբվենցիոն ծրագրի շրջանակներում հիմնանորոգման հաջորդ հասցեն Գագարին բնակավայրն է, որտեղ նախատեսված է Շիրազ փողոցի՝ 9616 քմ տարածքի հիմնանորոգում: Ծրագրի պայմանագրային արժեքը կազմում է 147 միլիոն 638 հազար 290 դրամ է, որի 50 տոկոսը հատկացնում է ՀՀ կառավարությունը 50 տոկոսը` Սեւանի համայնքապետարանը։

Շինարարական աշխատանքները Սեւան քաղաքի եւ Գագարին բնակավայրի Շիրազի փողոցներում նախատեսվում էր ավարտել այս տարվա ընթացքում։

«Սևան համայնքի փողոցների հիմնանորոգման աշխատանքներ» սուբվենցիոն ծրագրի 1-ին փուլով իրականացվել են Սևան քաղաքի շուրջ մեկ տասնյակ փողոցների հիմնանորոգման աշխատանքներ: