ՄԱԿ-ի փորձագետներն Իսրայելին մեղադրել են Գազայում ցեղասպանության համար

Միավորված ազգերի կազմակերպության անկախ միջազգային հետաքննչական հանձնաժողովը 72 էջից բաղկացած զեկույց է հրապարակել, որում, փաստերը համադրելով, Գազայի հատվածում Իսրայելի գործողությունները որակում է, որպես Ցեղասպանություն։ «Արմենպրես»-ի փոխանցմամբ՝ Պաղեստինի գրավյալ տարածքների, այդ թվում՝ Արևելյան Երուսաղեմի և Իսրայելի հարցերով զբաղվող հանձնաժողովի «Իսրայելի վարքագծի իրավական վերլուծությունը Գազայում՝ համաձայն «Ցեղասպանության հանցագործության կանխարգելման և պատժի մասին» կոնվենցիայի» զեկույցը հրապարակված է ՄԱԿ պաշտոնական կայքում։

«2023 թվականի հոկտեմբերի 7-ին Իսրայելը սկսեց իր ռազմական հարձակումը Գազայում, որը ներառում էր ավիահարվածներ և ցամաքային գործողություններ։ Ռազմական գործողությունների արդյունքում այդ ժամանակից ի վեր Գազայում տասնյակ հազարավոր պաղեստինցիներ են զոհվել, այդ թվում՝ մի քանի սերունդ պարունակող ամբողջական ընտանիքներ։ 2023 թվականի հոկտեմբերի 7-ից մինչև 2025 թվականի հուլիսի 31-ը սպանվել է 60199 պաղեստինցի, որից 18430-ը՝ երեխա, իսկ 9735-ը՝ կին»,- նշված է զեկույցում։

Հանձնաժողովն արձանագրել է, որ Իսրայելը ծանր ռազմամթերք է օգտագործել Գազայի խիտ բնակեցված թաղամասերում, ինչպես նաև 498 անգամ թիրախավորել բժշկական հաստատությունները, ինչի հետևանքով առնվազն 747 մարդ է զոհվել, այդ թվում՝ հղի կանայք և երեխաներ։

«Գազայում պաղեստինցիները հարձակման են ենթարկվել իրենց տներում, հիվանդանոցներում, ապաստարաններում (ներառյալ դպրոցները և կրոնական հաստատությունները), տարհանման ժամանակ և հատուկ նշանակված անվտանգ վայրերում։ Իսրայելի բանակի կողմից թիրախավորվել են քաղաքացիական անձինք, լրագրողներ, բուժաշխատողներ, հումանիտար աշխատողները։ Ըստ Գազայի Առողջապահության նախարարության տվյալների՝ 2025 թվականի ապրիլի 15-ի դրությամբ, սպանվել է 1400 բուժաշխատող, 408 հումանիտար աշխատող և առնվազն 170 լրագրող և լրատվամիջոցների աշխատակից»,- արձանագրված է փաստաթղթում։

Փաստերի համադրմամբ՝ ՄԱԿ-ի անկախ միջազգային հետաքննչական հանձնաժողովը եզրակացրել է, որ Իսրայելի կողմից իրականացվել է չորս ցեղասպանական գործողություն՝ սպանություններ, լուրջ մարմնական և մտավոր վնասվածքների պատճառում, դիտավորյալ ոչնչացմանը նպաստող կենսապայմանների ստեղծում և ծնելիությունը կանխելու համար նախատեսված միջոցառումների կիրառում:

Հանձնաժողովը զեկույցի վերջում Իսրայելի կառավարությանը հորդորել է անհապաղ դադարեցնել ցեղասպանական գործողությունների իրականացումը Գազայի հատվածում և լիովին պահպանել ՄԱԿ-ի միջազգային դատարանի կողմից սահմանված միջանկյալ միջոցները։