«Արմենպրես»-ը համագործակցություն է հաստատել Լեհաստանի «PAP» ազգային լրատվական գործակալության հետ

Հայաստանի «Արմենպրես» պետական լրատվական գործակալությունն ու լեհական «PAP» ազգային գործակալությունը փոխգործակցության համաձայնագիր են ստորագրել: Փաստաթղթով գործակալությունները համաձայնության են եկել անգլերեն լրատվության փոխանակման շուրջ: Համաձայնագրով նախատեսվում է նաև փորձի փոխանակման հնարավորություններ գործակալությունների աշխատակիցների համար։ Այս համագործակցությունն առաջինն է Հայաստանի և Լեհաստանի գործակալությունների միջև: Համաձայնագիրը ստորագրել են «Արմենպրես»-ի տնօրեն Նարինե Նազարյանը և «PAP»-ի գլխավոր խմբագիր Վոյչեխ Տումիդալսկին։ 

Տումիդալսկին առցանց ստորագրման արարողության ընթացքում խոսեց փոխգործակցության հաստատման կարևորության մասին։ 

«Շատ ուրախ ենք, որ պաշտոնապես ձևակերպվեց «PAP» ազգային գործակալության և «Արմենպրես» լրատվական գործակալության միջև երկկողմ համագործակցությունը: Ես խորապես հավատացած եմ, որ մեր գործակալությունները համաշխարհային լրատվական համակարգի կարևոր մասն են: Այժմ, ավելի քան երբևէ, մենք պատասխանատու ենք փաստերի հավաստիության համար և ամրապնդում ենք սոցիալական ու ազգային դիմակայունությունը ապատեղեկատվության նկատմամբ։ Մասնագիտական և հուսալի աղբյուրների համագործակցությունը տեղեկատվության փոխանակման հարցում հայ և լեհ հասարակությունները կդարձնի ավելի կայուն ու ուժեղ։ Եվս մեկ անգամ շնորհակալություն ենք հայտնում Ձեզ՝ «Արմենպրես»-ի մեր բարեկամներին, որ դա հնարավոր դարձրեցիք։ Եկեք միասին աշխատենք և միավորենք մեր ջանքերը հանուն լրագրության օբյեկտիվության և անկողմնակալության»,- ընդգծեց Վոյչեխ Տումիդալսկին։

«Արմենպրես»-ի տնօրեն Նարինե Նազարյանը խորհրդանշական համարեց, որ երկու գործակալություններն էլ հիմնադրվել են 1918 թվականին՝ ընդհանուր պատմությունը, դարի կերտած արժեքներն ու ժառանգությունը համարելով լավագույն հենքը գործակցության նոր դարաշրջանի մեկնարկի համար:

«Մեր անցած ուղին վկայում է, որ պատվով ենք դուրս եկել ժամանակի քննությունից, տոկուն ենք, հարմարվող ու նաև վճռական հասարակությանն իրազեկելու մեր առաքելության մեջ: Վստահ եմ՝ այս փաստաթուղթը գործակցության նոր դաշտ կբացի, համատեղ նորարար ծրագրերի հիմք կհանդիսանա և կօգնի մեր ժողովուրդներին ավելի լավ ճանաչել միմյանց»,-ընդգծեց Նազարյանը՝ շնորհակալություն հայտնելով PAP լրատվական գործակալության գործընկերներին՝ վստահության և գործակցության պատրաստակամության համար:

PAP-ը (Polska Agencja Prasowa) Լեհաստանի խոշորագույն լրատվական գործակալությունն է, որը թղթակիցների լայն ցանց ունի ինչպես երկրի ներսում, այնպես էլ աշխարհի մի քանի տասնյակ երկրներում։ Այն ակտիվորեն լուսաբանում է Լեհաստանում տեղի ուենցող քաղաքական, մշակութային, տնտեսական, տեխնոլոգիական ու սպորտային իրադարձությունները։

PAP-ը Լրատվական գործակալությունների եվրոպական դաշինքի (EANA) անդամ է։

«Արմենպրես» լրատվական գործակալությունը համագործակցության ու լուրերի փոխանակման համաձայնագրեր ունի միջազգային շուրջ չորս տասնյակ լրատվական գործակալությունների հետ։ Այն Գոտի և ճանապարհ լրատվական ցանցի (BRNN) անդամ է։ Լուրերի ակտիվ փոխանակման շնորհիվ գործակալությունը հնարավորություն ունի առաջին ձեռքից ստանալ արագ ու վստահելի տեղեկատվություն, ինչպես նաև Հայաստանում տեղի ունեցող զարգացումների մասին առաջինը տեղեկացնել միջազգային գործընկերներին։ Միջազգային ակտիվ փոխգործակցությունը հնարավորություն է տալիս նաև «Արմենպրես» լրատվական գործակալության աշխատակիցներին մասնագիտական վերապատրաստումների ու դասընթացների մասնակցել՝ համընթաց քայլելով ժամանակի պահանջներին։