1 րոպեի ընթերցում
ԱՄՆ պետքարտուղար Մարկո Ռուբիոն սեպտեմբերի 13-18-ը պաշտոնական այցերով կմեկնի Իսրայել և Մեծ Բրիտանիա։ «Արմենպրես»-ի հաղորդմամբ՝ այս մասին հաղորդագրություն է տարածել ԱՄՆ պետդեպարտամենտը։
Իսրայելում նա ուրվագծելու է Ամերիկայի առաջնահերթությունները Իսրայելի և ՀԱՄԱՍ-ի միջև հակամարտության համատեքստում, ինչպես նաև Մերձավոր Արևելքում անվտանգության ավելի լայն խնդիրներում՝ վերահաստատելով ԱՄՆ-ի հավատարմությունը Իսրայելի անվտանգությանը։ Պետքարտուղարը կընդգծի նաև ընդհանուր նպատակները՝ թույլ չտալ ՀԱՄԱՍ-ի վերադարձը Գազա և ապահովել բոլոր պատանդների վերադարձը։
Այնուհետև պետքարտուղարը կմեկնի Մեծ Բրիտանիա՝ միանալու ԱՄՆ նախագահի պատվիրակությանը նրա երկրորդ պետական այցի ընթացքում։ Ռուբիոն հանդիպելու է Մեծ Բրիտանիայի արտաքին գործերի նախարար Իվետ Կուպերի հետ։ Քննարկվելու են ԱՄՆ-ի և Մեծ Բրիտանիայի համագործակցությունը գլոբալ կարևորագույն հարցերում, այդ թվում՝ ռուս-ուկրաինական պատերազմի դադարեցումը, Իրանի կողմից միջուկային զենքի ստեղծման կանխումը, ՀԱՄԱՍ-ի կողմից պատանդների ազատումը, Գազայի հատվածում հրադադար հաստատումը, ինչպես նաև Չինաստանի հետ մրցակցությունը։