Եվրոպական երկրները պաշտպանական համակարգեր կուղարկեն Լեհաստան

Շվեդիան անհապաղ Լեհաստան կուղարկի հակաօդային պաշտպանության միջոցներ և ավիացիա: Ինչպես հաղորդում է «Արմենպրես»-ը, այդ մասին սեպտեմբերի 10-ին հայտնել է Լեհաստանի ՊՆ ղեկավար Վլադիսլավ Կոսինյակ-Կամիշը։

«Ես հենց նոր Շվեդիայի պաշտպանության նախարարից տեղեկատվություն ստացա Լեհաստանին անհապաղ լրացուցիչ օգնություն, այդ թվում՝ ՀՕՊ համակարգեր և ավիացիա ուղարկելու մասին», - ասել է Կոսինյակ-Կամիշը, որի խոսքը մեջբերել է նախարարության մամուլի ծառայությունը։

Նա տեղեկացրել է, որ իր հերթին Նիդեռլանդները տրամադրում է պաշտպանական համակարգեր՝ Patriot զենիթահրթիռային համալիրներ, NASAMS համակարգեր, անօդաչու թռչող սարքերի դեմ պայքարի միջոցներ, ինչպես նաև 300 զինծառայող։

«Չեխիան, Մեծ Բրիտանիան, Ֆրանսիան, Գերմանիան, Իտալիան, Ֆինլանդիան և Բալթյան երկրները՝ բոլոր դաշնակիցները, պատրաստ են աջակցություն ցուցաբերել և կոնկրետ հայտարարություններ են արել։ Հյուսիսատլանտյան պայմանագրի 4-րդ հոդվածի ուժի մեջ մտնելը հազվադեպ և լուրջ իրավիճակ է», - ընդգծել է Կոսինյակ-Կամիշը։

Լեհաստանի զինված ուժերի օպերատիվ հրամանատարությունն ավելի վաղ հաղորդել էր երկրի օդային տարածությունում սահմանը խախտած անօդաչուների չեզոքացման գործողության մասին է։ 

Լեհաստանի վարչապետ Դոնալդ Տուսկը լրագրողներին հայտարարել է, որ «անօդաչուների ներխուժումը, հավանաբար, լայնածավալ սադրանք էր»։