2 րոպեի ընթերցում
Հրազդանում sեպտեմբերի 10-ին իր դռները կբացի նորաստեղծ կամերային թատրոնը։ Թատրոնի բացումը կնշանավորվի Հերման Ռաուչերի «Քաղցրիկ նոյեմբեր» գործի հիման վրա բեմադրված «Շտապիր սիրել» ներկայացմամբ։
Բեմադրության ռեժիսոր Արմեն Մարգարյանն «Արմենպրես»-ի թղթակցի հետ զրույցում նկատեց՝ Ռաուչերի ստեղծագործությանը վաղուց է ծանոթ.
«Այն ինձ գերել է անմիջականությամբ, երկխոսությունների բազմաշերտ կառուցվածքով, ազատամտությամբ, խորությամբ ու անսահման երևակայելու հնարավորությամբ։ «Շտապիր սիրել»-ը բացարձակ սիրո մասին է, որը կոտրում է կարծրատիպերը և չի ճանաչում սահմաններ»։
Թատրոնի գեղարվեստական ղեկավար և ներկայացման պրոդյուսեր Շահեն Փանոսյանն ընդգծեց, որ Հրազդանում կամերային թատրոն ունենալը տարիներ շարունակ եղել է իր և շատերի երազանքը։
«Ինստիտուտի տարիներից մտածել եմ, որ Հրազդանում պետք է լինի կամերային թատրոն։ Այժմ այդ երազանքը իրականություն է դարձել։ Թատրոնը տեղակայված է Կոստան Զարյանի անվան արվեստի դպրոցում, որը թատերական ուղղվածությամբ հայտնի կրթօջախ է։ Այստեղ են սովորել Նարինե Գրիգորյանը, Տիգրան Գյուլումյանը, նաև ես և կինս։ Բնական էր, որ այս դպրոցում պետք է ծնվեր կամերային թատրոն։ Ժամանակը հասունացել էր, և առաջին ներկայացմամբ էլ մեկնարկում է թատրոնի գործունեությունը»,- շեշտեց նա:
Ներկայացման դերակատարներն են Էլեն Գևորգյանը, Հայկ Պետրոսյանը և Անդրանիկ Անտոնյանը։