Թրամփի վարչակազմը դիմել է Գերագույն դատարանին՝ մոտ 4 մլրդ դոլարի արտաքին օգնության կասեցումը թույլատրելու համար
1 րոպեի ընթերցում
ԱՄՆ նախագահ Դոնալդ Թրամփի վարչակազմը դիմել է Գերագույն դատարանին՝ ընդառաջելու Կոնգրեսի կողմից հաստատված միլիարդավոր դոլարների արտաքին օգնությունը կասեցնելու իր փորձին, որը հանդիսանում է հանրապետական նախագահի կողմից արտասահմանյան երկրներին տրամադրվող օգնությունը կրճատելու ջանքերի մաս։
«Արմենպրես»-ի հաղորդմամբ՝ այս մասին հայտնում է «Reuters»-ը՝ մանրամասնելով, որ Արդարադատության նախարարությունը խնդրել է դատարանին կասեցնել Վաշինգտոնի ԱՄՆ շրջանային դատավորի որոշումը, որը վարչակազմի պաշտոնյաներից պահանջում էր միջոցներ ձեռնարկել՝ ծախսելու այն մոտ 4 միլիարդ դոլարը, որը նրանք փորձում էին հետ ստանալ։
Նշվում է, որ վիճարկվող այդ ֆինանսական միջոցները նախատեսված էին Կոնգրեսի կողմից արտաքին օգնության, ՄԱԿ-ի խաղաղապահ գործողությունների և արտասահմանում ժողովրդավարության խթանման ջանքերի համար։
Ըստ աղբյուրի՝ Արդարադատության նախարարությունը հայտարարության մեջ նշել է, որ վարչակազմի կարծիքով վիճարկվող 4 միլիարդ դոլարի արտաքին օգնության ֆինանսավորումը անհամապատասխան է ԱՄՆ արտաքին քաղաքականությանը։