LINKS Europe-ը հայտարարում է «Հարավային Կովկասն առանց ականների 2025» արշավի մեկնարկի մասին

LINKS Europe-ը հայտարարում է «Հարավային Կովկասն առանց ականների 2025» արշավի մեկնարկի մասին։ Սա «Հարավային Կովկասն առանց ականների» արշավի չորրորդ փուլն է, որը LINKS Europe-ը համակարգում է 2019 թվականից։ Ինչպես նախորդ փուլերում, այս անգամ ևս արշավը կլինի տարածաշրջանային՝ ընդգրկելով Հայաստանը, Ադրբեջանը և Վրաստանը, և կընթանա հինգ պաշտոնական լեզվով՝ հայերեն, ադրբեջաներեն, վրացերեն, ռուսերեն և անգլերեն։ LINKS Europe-ը արշավի շրջանակում համագործակցելու է երեք երկրի շահագրգիռ կողմերի հետ։

«Արմենպրես»-ի հաղորդմամբ՝ արշավը կանցկացվի սեպտեմբերի 1-ից դեկտեմբերի 15-ը։ Առաջին փուլը՝ սեպտեմբերի 1-ից նոյեմբերի 15-ը, հիմնականում կլինի տեղեկատվական՝ օգտագործելով երեք երկրի ԶԼՄ-ները և սոցիալական մեդիան, ինչպես նաև ներգրավելով որոշում կայացնողներին և քաղաքացիական հասարակությանը։

Արշավի երկրորդ փուլում՝ նոյեմբերի 15-ից դեկտեմբերի 15-ը, այս տարի ուշադրության կենտրոնում կլինի ականային աղտոտվածության մարդկային և տնտեսական «գինը»։ Արշավի շրջանակում նոյեմբերի 30-ը կնշվի որպես Հարավային Կովկասում ականների և այլ չպայթած զինամթերքների պատճառով զոհերի հետ համերաշխության օր։

LINKS Europe-ի խոսնակի խոսքով՝ այս տարվա արշավը հատուկ նշանակություն ունի Հայաստանի և Ադրբեջանի խաղաղության գործընթացում արձանագրված առաջընթացի, ինչպես նաև 2025թ․ օգոստոսի 8-ին Սպիտակ տանը ԱՄՆ նախագահի հետ Հայաստանի և Ադրբեջանի առաջնորդների պատմական հանդիպման համատեքստում։ Վեց տարի՝ 2018-2024 թվականներին, LINKS Europe-ը զբաղվել է ականների խնդրով շատ բարդ քաղաքական միջավայրում, բայց միշտ պնդել է, որ արդյունավետ ականազերծման համար անհրաժեշտ է տարածաշրջանային մոտեցում։ Կառույցը մշտապես հավատացել է նաև, որ ականազերծումը կարող է դառնալ վստահություն կառուցող քայլ տարածաշրջանում։ «Հարավային Կովկասն առանց ականների 2025»-ը կրկին առաջ կքաշի այս գաղափարները, սակայն հաշվի առնելով, որ այժմ համատեքստը փոխվել է, և հաջողության հասնելու հնարավորություններն ավելի մեծ են։

Լրացուցիչ տեղեկությունների համար «Հարավային Կովկասն առանց ականների 2025»-ի վերաբերյալ հնարավոր է կապ հաստատել LINKS Europe Հարավային Կովկասի համակարգող՝ Գեորգի Սիմոնիշվիլիի հետ Թբիլիսիում՝ հեռ. +995 599 969875, էլ. փոստ՝ george@links-europe-eu կամ gsimonishvili@yahoo.co.uk: