Դվինի և Արուճի պեղումների արդյունքում մեծաքանակ հետաքրքիր նյութեր են հայտնաբերվել

ՀՀ ԳԱԱ Հնագիտության և ազգագրության ինստիտուտը տարեկան իրականացնում է մոտ 30 հնագիտական աշխատանք։

«Արմենպրես»-ի «Գիտության շաբաթ» փոդքասթ նախագծի շրջանակում այս մասին ասաց ՀՀ ԳԱԱ Հնագիտության և ազգագրության ինստիտուտի տնօրեն Արսեն Բոբոխյանը՝ հավելելով, որ տարբեր երկրների համալսարանների ու գիտական կազմակերպությունների հետ համագործակցությամբ պեղումներում ընդգրկվում են նաև միջազգային արշավախմբեր։

Անդրադառնալով ներկայում իրականացվող աշխատանքներից մի քանիսի արդյունքներին, Հնագիտության և ազգագրության ինստիտուտի տնօրենը,  մասնավորապես նշեց, որ Դվինում և Արուճում հայ-իտալական հնագիտական արշավախումբը մեծաքանակ հետաքրքիր նյութեր է հայտնաբերել, որոնք վերաբերում են միջնադարին։

«Դվինում պեղվում է շուկայական հատված։ Հնագիտական նյութերով ցույց է տրվում, թե ինչ առևտրական ճանապարհների վրա է այն գտնվել։ Արուճում հայ-իտալական արշավախումբը շատ հետաքրքիր պեղումներ է իրականացնում։ Վերականգնվում է Արուճի ամրոցը։ Այդ պեղումները ցույց են տալիս արդեն զարգացած միջնադարում՝ 9-11-րդ դարերում ինչ դեր է խաղացել Արուճը արդի Հայաստանի մշակութային լանդշաֆտում»,-մանրամասնեց Բոբոխյանը։

Նրա տեղեկատվությամբ՝ հայ-գերմանական արշավախմբի կողմից էլ հետազոտվում են Արագածի բարձր լեռնային հատվածներում հայտնաբերված Վիշապաքարերը։

Տիրինկատար կոչվող մշակութային լանդշաֆտում, մոտ 300 մետրի վրա պահպանվել են 12 արձաններ՝ վիշապաքարեր, որոնց պեղումները կարևոր նշանակություն ունեն Հայաստանի այդ հնագույն շրջանի հոգևոր մշակույթը վերականգնելու գործում»,-ընդգծեց Բոբոխյանը:

Նրա խոսքով՝ այդ կոթողները  թվագրվում են 4-2-րդ հազարամյակներով։

«Արդեն 1-ին հազարամյակից դրանք դուրս են մղված մեր մշակութային միջավայրից, բայց մնում են որպես հիշողություն, որը տրանսֆորմացված գալիս հասնում է մինչև մեր օրեր»,-ներկայացրեց Հնագիտության և ազգագրության ինստիտուտի տնօրենը։