Թրամփի վարչակազմը դեսպանատներին հրահանգել է կարծիք չհայտնել այլ երկրներում ընտրությունների մասին. Reuters
3 րոպեի ընթերցում
ԱՄՆ պետքարտուղար Մարկո Ռուբիոն հրահանգել է ամբողջ աշխարհի ամերիկացի դիվանագետներին մեկնաբանություններ չանել օտարերկրյա պետություններում անցկացված ընտրությունների արդարության կամ ամբողջականության վերաբերյալ։ «Արմենպրես»-ի փոխանցմամբ՝ այս մասին հաղորդում է Reuters-ը՝ վկայակոչելով իր տրամադրության տակ հայտնված ներքին գրությունը։
Հուլիսի 17-ի Պետքարտուղարության կողմից ԱՄՆ բոլոր դիվանագիտական ներկայացուցչություններին ուղարկված հրամանագրում ասվում է, որ Պետքարտուղարությունն այլևս չի հրապարակի ընտրությունների վերաբերյալ հայտարարություններ կամ սոցիալական ցանցերում գրառումներ Վաշինգտոնից, եթե չկա «հստակ և համոզիչ» արտաքին քաղաքականության շահ։
«Երբ տեղին լինի մեկնաբանել արտասահմանյան ընտրությունները, մեր ուղերձը պետք է լինի կարճ, կենտրոնացած հաղթող թեկնածուին շնորհավորելու և, անհրաժեշտության դեպքում, արտաքին քաղաքականության ընդհանուր շահերը նշելու վրա», - ասվում է գրության մեջ, որը նշվել է որպես «զգայուն», բայց ոչ գաղտնի։
Բացի այդ, նշվում է, որ հաղորդագրություններում չպետք է կարծիք արտահայտվի «ընտրական գործընթացի արդարության, դրա օրինականության կամ տվյալ երկրի ժողովրդավարական արժեքների վերաբերյալ»։ Ընտրություններին վերաբերող հաղորդագրությունները պետք է գան կա՛մ անձամբ պետքարտուղարից, կա՛մ նախարարության խոսնակից, իսկ ԱՄՆ դիվանագետներին արգելվում է նման հայտարարություններ անել՝ առանց արտաքին քաղաքական գերատեսչության ավագ ղեկավարության հստակ համաձայնության։
Գրության մեջ հղում է արվում նախագահ Դոնալդ Թրամփի՝ մայիսի 13-ին Էր Ռիադում ունեցած ելույթին, երբ նա քննադատել է «արևմտյան ինտերվենցիոնիստներին», որոնք Մերձավոր Արևելքի երկրներին ասում են, թե ինչպես կառավարել իրենց գործերը։ Թրամփն ասել էր, որ դա այլևս Վաշինգտոնի գործը չէ, և որ ԱՄՆ-ն ձգտում է գործընկերային հարաբերություններ հաստատել։
«Մինչ Միացյալ Նահանգները կպահպանի իր սեփական ժողովրդավարական արժեքները և կտոնի այդ արժեքները, երբ այլ երկրներն ընտրեն նմանատիպ ուղի, նախագահը հստակեցրել է, որ Միացյալ Նահանգները կհետապնդի գործընկերություն այն երկրների հետ, որտեղ մեր ռազմավարական շահերը համընկնում են», - ասվում է հրահանգում։
Այս գրության մասին Reuters-ի հարցին ի պատասխան՝ Պետքարտուղարության խոսնակը էլեկտրոնային փոստով ուղարկված մեկնաբանություններում կրկնել է հրահանգի որոշ կետեր՝ նշելով, որ այս մոտեցումը համապատասխանում է վարչակազմի կողմից «ազգային ինքնիշխանության» վրա շեշտադրմանը։