Գլխավոր դատախազությունը պահանջում է անվավեր ճանաչել ԼՂ ներկայացուցչության շենքի սեփականության գրանցումը
1 րոպեի ընթերցում
Հայաստանի գլխավոր դատախազությունը վարչական դատարան հայց է ներկայացրել՝ պահանջելով անվավեր ճանաչել Երևանում գտնվող շենքի նկատմամբ Լեռնային Ղարաբաղի կառավարության սեփականության իրավունքի պետական գրանցումը։
«Արմենպրես»-ն այս մասին տեղեկացավ «Դատալեքս» համակարգից։ Դատական գործը մակագրվել է վարչական դատարանի դատավոր Կարեն Զարիկյանին։
Դատախազությունը պահանջում է անվավեր ճանաչել 2007 թվականի հունվարի 31-ին Երևան քաղաքի Արաբկիր վարչական շրջանում՝ Ն. Զարյան փողոց 17Ա հասցեում գտնվող շինության նկատմամբ ԼՂ կառավարության սեփականության իրավունքի գրանցումը։
Գործի պատասխանող կողմ է ՀՀ կադաստրի կոմիտեն, իսկ որպես հայցվոր ներկայացվում է գլխավոր դատախազության ներկայացուցիչ Մերի Հովհաննիսյանը։
Դատական գործը վերաբերում է անշարժ գույքի նկատմամբ պետական գրանցման վկայականի (համար՝ 2239396) անվավեր ճանաչման պահանջին։ Դատական նիստերի օրերը դեռ չեն հրապարակվել։
Շենքը երկար տարիներ օգտագործվել է որպես Լեռնային Ղարաբաղի մշտական ներկայացուցչության գրասենյակ Երևանում։