Սերգեյ Լավրովն ու Կիմ Չեն Ինը քննարկել են երկկողմ հարաբերություններն ու ձեռք բերված պայմանավորվածությունները

Ռուսաստանի Դաշնության արտաքին գործերի նախարար Սերգեյ Լավրովը Կորեայի Ժողովրդա-Դեմոկրատական Հանրապետություն կատարած այցի շրջանակներում Վոնսանում հանդիպել է երկրի նախագահ Կիմ Չեն Ինի հետ։

«Արմենպրես»-ի հաղորդմամբ՝ այս մասին հայտնում է ՏԱՍՍ գործակալության թղթակիցը։ 

ՇՍերգեյ Լավրովը շնորհակալություն է հայտնել Հյուսիսային Կորեայի նախագահին հանդիպման հնարավորության համար։ 

«Սա միշտ մեզ խթան է տալիս զարգացնել հարաբերությունները նախագահ Պուտինի հետ ձեռք բերված այն պայմանավորվածություններին համահունչ, որոնք դուք ձեռք եք բերել, առաջին հերթին, խոսքը ռազմավարական գործընկերության պայմանագրի մասին է»,-ասել է Լավրովը։  

Վերջինս Հյուսիսային Կորեայի առաջնորդին է փոխանցել ՌԴ նախագահ Վլադիմիր Պուտինի ջերմ ողջույնները։  

«ՌԴ նախագահը հաստատում է իր հավատարմությունը ձեռք բերված բոլոր պայմանավորվածություններին։ Նա մեծ հույս ունի, որ շատ մոտ ապագայում կշարունակվեն ուղիղ շփումները»,- նշել է ՌԴ ԱԳ նախարարը։  

Լավրովը Կիմ Չեն Ինին տեղեկացրել է նաև ԿԺԴՀ արտգործնախարար Չհոյ Սոն Հիի հետ բանակցությունների մասին։

«Ձեր այցը շատ կարևոր պահ է մեր հատուկ և ամուր դաշինքը նոր մակարդակի հասցնելու համար, սա շատ կարևոր պահ է տարբեր ոլորտներում համագործակցության զարգացման առումով»,-իր հերթին ընդգծել է ԿԺԴՀ-ի առաջնորդը՝ հավելելով, որ շփումները կարևոր են երկու երկրների շահերի պաշտպանության համար։