5 րոպեի ընթերցում
Չինաստանի ամենազարգացած քաղաքներից Շենժեն այցելելիս զբոսաշրջիկները կարող են մեծ բավականություն ստանալ քաղաքի գեղեցիկ այգիներում զբոսնելով, ցուցահանդեսներ այցելելով, տեղի տեխնոլոգիական ձեռքբերումներին ծանոթանալով։ Իմիջիայլոց, տեխնոլոգիական զարգացման տարբեր դրսևորումների Շենժենում հնարավոր է հանդիպել ամեն քայլափոխի (մեծ էկրաններ, էլեկտրական մեքենաներ, գերժամանակակից տեխնոլոգիաներով հագեցած երկնաքերեր և այլն)։ Հատկապես մշակույթով հետաքրքրված զբոսաշրջիկների համար կարող է հրաշալի բացահայտում լինել Շենժենի ամենախոշոր այգիներից մեկը՝ «Հիանալի Չինաստան»-ը (Splendid China), որին կից «Չինական ժողովրդական մշակույթի գյուղ»-ն է (China Folk Culture Village):
«Արմենպրես»-ի հաղորդմամբ՝ Շենժենում հյուրընկալված լրագրողները հնարավորություն ունեցան այցելել բառի բուն իմաստով շքեղ, բուսականությամբ հարուստ, վառ գույներով ու մշակութային ընդգրկուն ներկապնակով այգի՝ անմոռանալի դարձնելով օրը։
Անծայրածիր թվացող այգում ազգային դեմքն ու դիմագիծը, ճարտարապետության յուրահատկություններն արտացոլող մի շարք հրաշալի կառույցներ կան։ Հետաքրքիր են տարբեր ազգային փոքրամասնություններին նվիրված շինությունները՝ տաճարներ, խրճիթներ, մշակույթի կենտրոններ հիշեցնող փոքրիկ տներ։ Այգում տարբեր ազգերի ներկայացուցիչներն այցելուներին են ներկայացնում իրենց ավանդական երգն ու պարը, հանդես են գալիս ինտերակտիվ ներկայացումներով՝ իրենց հետ երգելու, պարելու հնարավորություն ընձեռելով։ Պետք է խոստովանել՝ գունավոր այգում ժամանակն արագ է անցնում։
«Չինական ժողովրդական մշակույթի գյուղ»-ը Չինաստանի առաջին խոշորամասշտաբ մշակութային զբոսաշրջային տարածքն է, որը մեկ այգում միավորում է տարբեր էթնիկ խմբերի ժողովրդական արվեստը, սովորույթները և բնակելի ճարտարապետությունը: Այն 200 հազար քառակուսի մետր տարածք է զբաղեցնում։ Բացվել է 1991 թվականի հոկտեմբերին, ունի 25 տիպիկ գյուղ, որոնք ներկայացնում են 22 էթնիկ խմբի: Ինչպես արդեն ասվեց, այգում հնարավոր է դիտել մի շարք ներկայացումներ՝ «Ոսկե դինաստիա» մարտադաշտի շոու (ձիասպորտի վերակառուցում), «Արևելյան զգեստների էպոս», «Չինաստանի վիշապի և փյունիկի պար» (լայնածավալ հրապարակային արվեստի երեկոյի շոու) և այլն։
Գյուղը ցուցադրում է Չինաստանի էթնիկ խմբերի իսկական, հարուստ և բազմազան կենսակերպը, սովորույթներն ու ժողովրդական մշակույթը՝ բազմաթիվ եղանակներով։
Այգում կանոնավոր անցկացվում են մեծածավալ ժողովրդական փառատոններ՝ «Չինական էթնիկ տաճարի տոնավաճառ», «Ջրցող փառատոն», «Ջահերի փառատոն», «Ներքին Մոնղոլիայի մշակույթի շաբաթ» և այլն։ Այս բազմակողմանի մոտեցումն այցելուներին թույլ է տալիս զգալ չինացիների հոգին և հմայքը։ «25 գյուղ, 56 էթնիկ սովորույթ» թեմայով «Չինական ժողովրդական մշակույթի գյուղ»-ը ձեռք է բերել չինական ֆոլկլորի թանգարանի համբավ։
Այգում աչքի են զարնում հան էթնիկ խմբի հուշահամալիր-կամարակապ համալիրը և պեկինյան ոճի բակերը։ Փոքրամասնությունների գյուղերից են Մյաոն, Դոնգը, Յաոն, Լին և այլն։ Այդ գյուղերի երիտասարդ տղամարդիկ և կանայք ջերմորեն ողջունում են հյուրերին, անհրաժեշտության դեպքում պատասխանում հյուրերի հարցերին։
Բնակելի ճարտարապետության եզակի նմուշներ են Բույեի քարե գյուղերը, Մոսուո փայտե տները, Հանի սնկի տեսքով տները, Դայի բամբուկե տները, ղազախական յուրտերը, Տուջիայի ջրային փողոցային շուկաները, մոնղոլական յուրտերը, Յիի հողաշեն տները և այլն։
«Չինական ժողովրդական մշակույթի գյուղ»-ում կազմակերպվող ամենասպասված իրադարձություններից մեկն ամենամսյա լայնածավալ ժողովրդական փառատոնն է։ Այդ խոշոր, ռոմանտիկ, տոնական միջոցառումներն այցելուներին հնարավորություն են տալիս լիովին վայելել ցնծալի հավաքույթներն ու գնահատել չին ազգի կենսակերպի կենդանի պոեզիան։