Նորամարգում հրդեհի հետևանքով ամբողջությամբ այրվել է ավտոտնակ և ավտոմեքենա

Արարատի մարզային փրկարարական վարչության ճգնաժամային կառավարման կենտրոն հուլիսի 5-ին՝ ժամը 13:30-ին  ահազանգ է ստացվել, որ Նորամարգ գյուղի 81-րդ փողոցում այրվում է ավտոտնակ։ «Արմենպրես»-ի հաղորդմամբ՝ այս մասին տեղեկություն է տարածում ՆԳՆ փրկարար ծառայությունը։

Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից երկու մարտական հաշվարկ:

Պարզվել է, որ հրդեհը բռնկվել է Նորամարգ գյուղի Ազատության փողոցում գտնվող երկու ավտոտնակներում:

Հրդեհը մեկուսացվել է ժամը 13։58-ին, մարվել՝ 14։10-ին: Այրվել են ավտոտնակներից մեկը (մոտ 30 քմ), ներսում գտնվող «Mercedes-Benz» մակնիշի ավտոմեքենան և մյուս ավտոտնակի դուռը: