ԵՄ-ում դեռևս շարունակվում են ՀՀ-ին Խաղաղության հիմնադրամի միջոցով 20 մլն եվրո հատկացնելու քննարկումները
2 րոպեի ընթերցում
Եվրամիությունում դեռևս չի ընդունվել Հայաստանի համար Խաղաղության հիմնադրամի միջոցով 20 միլիոն եվրոյի հավելյալ օգնություն հատկացնելու որոշումը։
«Արմենպրես»-ի հաղորդմամբ՝ այս մասին հայտարարեց ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասը՝ պատասխանելով լրագրողի հարցին այն մասին, թե ի՞նչ փուլում է Խաղաղության եվրոպական հիմնադրամի միջոցներից Հայաստանին աջակցություն տրամադրելու գործընթացը և արդյոք Հունգարիան վետո է դնում դրա վրա։
«Եվրոպական Միությունը կազմված է 27 ժողովրդավարական երկրներից, ինչը որոշումներ կայացնելու գործընթացը դարձնում է բարդ։ Երբեմն որևէ երկիր կարող է արգելափակել որոշման ընդունումը։ Այո, չենք հասել դեռ որոշման, դա այդպես է։ Բայց մենք աշխատում ենք այդ հարցին լուծում գտնելու ուղղությամբ»,- նշեց Կալասը։
Հունգարիան վետո է դրել ԵՄ կողմից Խաղաղության եվրոպական հիմնադրամի (ԵՀՀ) շրջանակում Հայաստանին 20 միլիոն եվրոյի հավելյալ «ոչ մահաբեր» ռազմական աջակցություն տրամադրելու առաջարկի վրա։ Այս նախաձեռնությունը ներկայացվել էր հենց Կայա Կալասի կողմից, և այն պաշտպանել էին ԵՄ մնացած անդամ բոլոր երկրները՝ բացառությամբ Հունգարիայի։
Հունիսի 24-ին Լյուքսեմբուրգում ԵՄ արտաքին գործերի նախարարների հանդիպման ընթացքում ևս Բուդապեշտը պահպանել է իր վերապահումը։ «Այսօրվա բանակցություններից հետո դեռևս առաջընթաց չի գրանցվել»,- «Ազատություն» ռադիոկայանի հետ զրույցում նշել էր դիվանագիտական աղբյուրը։
2023 թվականի հուլիսին Հայաստանը ԵՄ-ից ստացել էր առաջին՝ 10 միլիոն եվրոյի «ոչ մահաբեր» ռազմական աջակցությունը, որը նախատեսված է դաշտային հոսպիտալի ստեղծման և հայկական բանակի գումարտակի մակարդակի ստորաբաժանման համար օժանդակ միջոցների ձեռքբերման նպատակով։ Նոր փաթեթը պետք է լրացներ այդ աջակցությունը՝ ԵՄ-ի՝ Հայաստանի հետ խորացված գործընկերության և անվտանգության ամրապնդման ընդհանուր ռազմավարության շրջանակում։