ՄՔԾ պետ Նելլի Դավթյանը և աշխատակիցները մասնակցել են «Սոցիալական մարդու իրավունքների ամրապնդումը Հայաստանում» ծրագրի ներկայացմանը
2 րոպեի ընթերցում
ՆԳՆ միգրացիայի և քաղաքացիության ծառայության պետ Նելլի Դավթյանը և աշխատակիցները մասնակցել են «Սոցիալական մարդու իրավունքների ամրապնդումը Հայաստանում» ծրագրի ներկայացմանը։
Ինչպես «Արմենպրես»-ին տեղեկացրին ՀՀ ներքին գործերի նախարարությունից, ծրագրի նպատակն է աջակցել պետական կառավարման համակարգի լիազոր մարմիններին, իրավաբանական մասնագետներին, քաղաքացիական հասարակությանը և այլ շահագրգիռ կողմերին՝ խորացնելու Եվրոպական սոցիալական խարտիայի և Եվրոպայի խորհրդի մարդու իրավունքների այլ համապատասխան գործիքների վերաբերյալ իրենց ըմբռնումը, և բարձրացնել հայ իրավաբանական մասնագետների իրազեկվածությունը և կարողությունները։
Մասնավորապես, ծրագրի շրջանակում Եվրոպայի խորհրդի HELP «Մարդկանց թրաֆիքինգի դեմ պայքար» դասընթացով նախատեսվում է տրամադրել իրավական և գործնական գործիքներ՝ եվրոպական չափանիշներին համապատասխան թրաֆիքինգը բացահայտելու, կանխելու և դրան արձագանքելու համար։
Դասընթացն ուղղված է դատավորներին, դատախազներին, փաստաբաններին, իրավապահ մարմինների աշխատակիցներին Եվրոպայի խորհրդի «Մարդկանց թրաֆիքինգի դեմ պայքարի մասին» կոնվենցիայի և այլ միջազգային չափանիշների և պրակտիկայի շրջանակներում մշակված չափանիշների արդյունավետ կիրառմանը:
ՄՔԾ պետ Նելլի Դավթյանի հավաստմամբ՝ դասընթացների շարքը տարբեր թեմաներով մասնագիտական խորը կարողություններ կձևավորի Ծառայության աշխատակիցների շրջանում։ Մասնավորապես, կարևոր է խորը գիտելիքի տիրապետումը՝ ինչպես որոշումների կայացման օղակում և քաղաքականության մշակողների շրջանում, այնպես էլ սպասարկող անձնակազմի։
Ըստ աղբյուրի՝ այսպիսով, դերակատարները մշակվող քաղաքականությունների համատեքստում կանխարգելիչ մեխանիզմներ ներդնելու և ինտեգրելու հնարավորություն են ստանում, իսկ սպասարկող անձնակազմի դեպքում՝ կարևոր է գիտելիքների կուտակումը հետևանքների հետ աշխատելու իմաստով։