Հայաստանում 2025-ի առաջին հինգ ամիսներին տնտեսական ակտիվության ցուցանիշն աճել է 5․7 տոկոսով
4 րոպեի ընթերցում
Ընթացիկ տարվա հունվար-մայիս ամիսներին Հայաստանում տնտեսական ակտիվության ցուցանիշը 5․7 տոկոսով գերազանցել է մեկամյա վաղեմության տվյալը։
«Արմենպրես»-ի հաղորդմամբ՝ այս մասին նշված է ՀՀ վիճակագրական կոմիտեի հրապարակած հերթական ամփոփագրում։
Մայիսին այն 5․4 տոկոսով բարձր է եղել նախորդ ամսվա ցուցանիշից, իսկ 2024 թվականի մայիսի համեմատ աճել է 10․4 տոկոսով։
Այս տարվա առաջին հինգ ամիսներին արդյունաբերական արտադրանքի ծավալը 14.1 տոկոսով ցածր է եղել 2024-ի նույն ժամանակահատվածի ցուցանիշից՝ կազմելով 1 տրլն 30 մլրդ 846․9 մլն դրամ։ Մայիսին՝ մեկ ամսվա կտրվածքով, աճել է 2․9 տոկոսով՝ կազմելով 218 մլրդ 591․1 մլն դրամ։ Ընդ որում, նախորդ տարվա մայիսի ցուցանիշից ցածր է եղել 5․9 տոկոսով։
Շինարարության ծավալը հունվար-մայիսին 17․1 տոկոսով է գերազանցել նախորդ տարվա նույն ժամանակահատվածի ցուցանիշը՝ կազմելով 165 մլրդ 463․3 մլն դրամ։ Մայիսին՝ ապրիլի համեմատ, գրանցվել է 24․8 տոկոսի աճ։ Նախորդ տարվա մայիսի համեմատ աճը 22․2 տոկոս է։ Այս տարվա գարնան վերջին ամսին իրականացվել է 48 մլրդ 878․9 մլն դրամի շինարարություն։
Առևտրի շրջանառությունը հունվար-մայիսին 4․2 տոկոսով գերազանցել է նախորդ տարվա նույն ժամանակահատվածի ցուցանիշը՝ կազմելով 2 տրլն 404 մլրդ 114․9 մլն դրամ։ Մայիսին՝ ապրիլի համեմատ, նվազել է 0․9 տոկոսով և նույնքանով ավել է եղել նախորդ տարվա մայիսի ցուցանիշից։ Մայիսին շրջանառությունը կազմել է 528 մլրդ 862․9 մլն դրամ։
Ծառայությունների ծավալը (առանց առևտրի) այս տարվա առաջին հինգ ամիսներին 10․1 տոկոսով է գերազանցել նախորդ տարվա նույն ժամանակահատվածի ցուցանիշը՝ կազմելով 1 տրլն 487 մլրդ 699․7 մլն դրամ։ Մայիսին՝ ապրիլի համեմատ, աճել է 1․8 տոկոսով՝ կազմելով 314 մլրդ 279 մլն դրամ։ Նախորդ տարվա մայիսի համեմատ գրանցվել է 10․8 տոկոսի աճ։
Սպառողական գների ինդեքսը հունվար-մայիսին 3 տոկոսով բարձր է եղել նախորդ տարվա նույն ժամանակահատվածի ցուցանիշից։ Մայիսին՝ ապրիլի համեմատ, աճել է 0․3, իսկ նախորդ տարվա մայիսի համեմատ՝ 4․3 տոկոսով։
Արդյունաբերական արտադրանքի գների ինդեքսը հունվար-մայիսին 2․1 տոկոսով բարձր է եղել, քան նախորդ տարվա նույն ժամանակահատվածում։ Մայիսին՝ ապրիլի համեմատ, աճել է 0․6, իսկ նախորդ տարվա մայիսի համեմատ՝ 2․2 տոկոսով։
Էլեկտրաէներգիայի արտադրությունն այս տարվա առաջին հինգ ամիսներին 0․6 տոկոսով գերազանցել է նախորդ տարվա նույն ժամանակահատվածի ցուցանիշը։ Արտադրվել է 3 մլրդ 709․4 մլն կիլովատ/ժամ էլեկտրաէներգիա։ Մայիսին՝ ապրիլի համեմատ, արտադրվել է 11․4 տոկոսով քիչ՝ 579․8 մլն կՎտ.ժամ։ Դա 8․6 տոկոսով քիչ է նախորդ տարվա մայիսի ցուցանիշից։ Նշվում է, որ սույն ցուցանիշում ներառված չեն էլեկտրաէներգիայի փոխհոսքերի մասով ինքնավար արտադրողների կողմից արտադրված էլեկտրաէներգիայի մասին տվյալները: Համադրելիության ապահովման նպատակով աճի տեմպերը հաշվարկելիս նախորդ ժամանակաշրջանների համանուն ցուցանիշներում (դեկտեմբեր՝ 894.4, հունվար՝ 879.5, փետրվար՝ 778.7, մարտ՝ 789.2, ապրիլ՝667.9, մայիս՝ 634.2) այն ևս ներառված չէ:
Գյուղատնտեսության համախառն արտադրանքի ծավալների և միջին ամսական անվանական աշխատավարձի վերաբերյալ տվյալներ չեն ներկայացվել։