1 րոպեի ընթերցում
Քաղաքացիական դատարաններում գործերի քննության տեմպերն էականորեն բարելավվել են՝ շնորհիվ այն կարգավորման, որով մինչև 2 մլն դրամ գումարի բռնագանձման պահանջները հանձնարարվում են նոտարներին։
«Արմենպրես»-ի հաղորդմամբ՝ կառավարության նիստում այս մասին հայտարարեց արդարադատության նախարար Սրբուհի Գալյանը՝ընդգծելով, որ այս քայլը հնարավորություն է տվել զգալիորեն բեռնաթափել դատարանները։
«Նախորդ տարվա ընթացքում դատարանների ծանրաբեռնվածությունը նվազեցվել է 80 տոկոսով՝ այս կարգավորման շնորհիվ։ Այդ դեպքերում հայցերը դատարան չեն ներկայացվել, ինչը թույլ է տվել դատավորներին կենտրոնանալ ավելի բարդ գործերի վրա»,-ասաց նա։
Գալյանը հավելեց, որ նման արդյունավետ լուծումները կփորձեն ներդնել նաև դատավարության այլ ոլորտներում՝ քրեական և վարչական գործերով ընթացակարգերում, ինչը կբերի ամբողջ դատական համակարգի արդյունավետության բարձրացման։