ՀՀ և Լեհաստանի ԱԳՆ-ները քաղաքական խորհրդակցություններում անդրադարձել են երկկողմ, ՀՀ-ԵՄ գործընկերության, միջազգային և տարածաշրջանային հարցերի
2 րոպեի ընթերցում
Երևանում կայացել են քաղաքական խորհրդակցություններ Հայաստանի Հանրապետության և Լեհաստանի Հանրապետության արտաքին գործերի նախարարությունների միջև՝ ՀՀ ԱԳ նախարարի տեղակալ Վահան Կոստանյանի և Լեհաստանի ԱԳ նախարարի տեղակալ Մարեկ Պրավդայի գլխավորությամբ:
Ինչպես «Արմենպրես»-ին տեղեկացրին ՀՀ արտաքին գործերի նախարարությունից, կողմերը խորհրդակցությունների ընթացքում անդրադարձ են կատարել Հայաստանի և Լեհաստանի միջև երկկողմ օրակարգի հարցերի լայն շրջանակի՝ երկուստեք բարձր գնահատելով երկու երկրների միջև ձևավորված քաղաքական երկխոսությունը և ընդգծելով երկկողմ բարձրաստիճան փոխայցելությունների կարևորությունը։
Կողմերն անդրադարձ են կատարել Հայաստան-Եվրոպական Միություն հարաբերություններին, Եվրոպական Միության խորհրդում Լեհաստանի նախագահությանը և Հայաստան-Եվրոպական Միություն գործընկերությանը վերաբերող մի շարք հարցերի։
Ըստ աղբյուրի՝ մտքեր են փոխանակվել եվրոպական ինտեգրման փորձի ուսումնասիրման և փոխանակման կարևորության վերաբերյալ:
Հանդիպման ընթացքում քննարկվել են նաև միջազգային և տարածաշրջանային զարգացումներին առնչվող թեմաներ: Նախարարի տեղակալ Կոստանյանը ներկայացրել է խաղաղության գործընթացի վերջին զարգացումները և Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին համաձայնագրի ստորագրման, ինչպես նաև տարածաշրջանային հաղորդակցությունների արդյունավետ ապաշրջափակման կարևորությունը։