Տրիպոլիում արտակարգ դրություն է հայտարարվել անվտանգության ծառայության ղեկավարի զոհվելուց և բախումներից հետո
2 րոպեի ընթերցում
Լիբիայի Ազգային համաձայնության կառավարությունը, որը տեղակայված է Տրիպոլիում, արտակարգ դրություն է հայտարարել մայրաքաղաքում տեղի ունեցած կատաղի բախումներից հետո, որոնց նախորդել էր Լիբիայի նախագահական խորհրդի անվտանգության ծառայության ղեկավար Աբդել Ղանի ալ-Քիքլիի սպանությունը։ «Արմենպրես»-ի փոխանցմամբ՝ այս մասին հաղորդում է «Ինտերֆաքս» գործակալությունը։
Նախագահական խորհրդին կից կայունության վարչության ղեկավար Աբդել Ղանի ալ-Քիքլին սպանվել է մայիսի 12-ի երեկոյան Տրիպոլիի ռազմական շրջանի 444-րդ բրիգադի շտաբում, չպարզված հանգամանքներում։
Նրա մահը զանգվածային բռնությունների է հանգեցրել Տրիպոլիի մի քանի շրջաններում, բնակիչները հայտնել են շարունակվող կրակոցների և պայթյունների մասին:
Ներքին գործերի նախարարությունը բնակիչներին կոչ է արել մնալ տանը՝ պատճառաբանելով անվտանգության «կրիտիկական» և արագ փոփոխվող իրավիճակը: Իր հերթին, կրթության նախարարությունը դադարեցրել է դասերը Տրիպոլիի ողջ տարածքում։
Անկարգությունների պատճառով «Միտիգա» միջազգային օդանավակայանը հայտարարել է օդային հաղորդակցության ամբողջական դադարեցման մասին՝ մուտքային թռիչքներն ուղարկելով այլ օդանավակայան։
Միևնույն ժամանակ, Լիբիայում ՄԱԿ-ի աջակցության առաքելությունը (UNSMIL) կոչ է արել անհապաղ ապաէսկալացնել իրավիճակը:
Մայիսի 13-ի վաղ առավոտյան տարածված հայտարարության մեջ UNSMIL-ը հայտարարել է, որ «անհանգստացած է Տրիպոլիում անվտանգության զարգացող իրավիճակով, որն ուղեկցվում է խիտ բնակեցված քաղաքացիական շրջաններում ծանր զինատեսակների կիրառմամբ ինտենսիվ մարտերով»:
Կազմակերպությունը բոլոր կողմերին կոչ է արել «անհապաղ դադարեցնել ռազմական գործողությունները և վերականգնել անդորրը» և բոլոր կողմերին հիշեցրել է «մշտապես խաղաղ բնակիչներին պաշտպանելու իրենց պարտավորությունների մասին»: