383.94
Մոսկվան որևէ հայտարարություն չի լսել Ուկրաինայի ղեկավարությունից հրադադարին միանալու առնչությամբ․ Պեսկով
1 րոպեի ընթերցում
Մոսկվան դեռևս որևէ հայտարարություն չի լսել Ուկրաինայի ղեկավարությունից Հաղթանակի օրվան նվիրված հրադադարին միանալու պատրաստակամության մասին։ Ինչպես «Արմենպրես»-ը տեղեկանում «Ինտերֆաքս» գործակալությունից, այս մասին լրագրողներին հայտնել է ՌԴ նախագահի մամուլի քարտուղար Դմիտրի Պեսկովը։
«Ցավոք, մենք դեռևս չենք լսել Կիևից, ռեժիմի ներկայացուցիչներից, ռեժիմի ղեկավարից որևէ հայտարարություն, որը կխոսեր տոնական հրադադարին միանալու պատրաստակամության մասին», - ասել է նա։
Պեսկովը նշել է, թե Կիևի վարչակազմը «հակված է պատերազմի շարունակմանը»։
Կրեմլի ներկայացուցիչը նաև հիշեցրել է, որ հայտարարված հրադադարն ուժի մեջ է մնում, սակայն եթե ռուսական դիրքերին հարվածներ հասցվեն, ապա համարժեք պատասխան կտրվի։
Ապրիլի վերջին ՌԴ նախագահ Վլադիմիր Պուտինը Հաղթանակի 80-ամյակի կապակցությամբ մայիսի 8-ի կեսգիշերից եռօրյա հրադադար էր հայտարարել։
«ՌԲԿ Ուկրաինա»-ի տեղեկացմամբ՝ Ուկրաինայի նախագահ Վոլոդիմիր Զելենսկին հրադադարի առնչությամբ ավելի վաղ հայտնել էր, որ իր երկիրը պատրաստ է հրադադարի «նույնիսկ այսօրվանից», բայց միայն այն դեպքում, եթե Ռուսաստանի Դաշնությունը պատրաստ լինի փոխադարձ քայլեր ձեռնարկել։
Բաժանորդագրվեք մեր ալիքին Telegram-ում