Հայաստանում կանանց նկատմամբ խտրականության և ընտանեկան բռնության դեմ պետք է անողոք պայքար մղել․ Արարատ Միրզոյան
2 րոպեի ընթերցում
Հայաստանի Հանրապետությունում կանանց նկատմամբ խտրականությունն ու ընտանեկան բռնությունն իրականություն են, և այս խնդիրները այլևս չի կարելի շրջանցել կամ թաքցնել։ «Արմենպրես»-ի հաղորդմամբ՝ այս մասին հայտարարեց ՀՀ արտաքին գործերի նախարար Արարատ Միրզոյանն՝ ապրիլի 23-ին կայացած Կառավարության նիստում։
«Կարծում եմ՝ վաղուց ժամանակն է, որ մենք բարձրաձայն խոստովանենք՝ Հայաստանի Հանրապետությունում կա խտրականություն կանանց նկատմամբ։ Ավելի ասեմ՝ կա բռնություն կանանց նկատմամբ, և կա ընտանեկան բռնություն»,-նշեց նախարարը։
Նրա խոսքով՝ հասարակության մեջ ձևավորված է կարծրատիպ, թե նման երեւույթները բնորոշ են միայն մարզերին: «Սակայն նշեմ, որ դրանք առկա են նաև մայրաքաղաքում»,- ընդգծեց նա:
Միրզոյանը քննադատեց նաև այն երկակի վերաբերմունքը, երբ հասարակական միջավայրում հնչում են, իր բնորոշմամբ՝ «ճոռոմ» բառեր կանանց մասին, մինչդեռ իրական կյանքում կանայք հաճախ բախվում են անհարգալից և բռնարար վերաբերմունքի։
Միրզոյանը շեշտեց՝ խտրականության դեպքում հանրային և տնտեսական կյանքում հնարավոր է լինում լրացուցիչ գործիքներ կիրառել՝ կրթական և հոգեբանական մոտեցումներով: Բռնությունն ընդհանրապես անընդունելի և անբացատրելի է։
Նախարարն ընդգծեց՝ պետությունը պետք է վճռական և համակարգային քայլեր ձեռնարկի։ Նա առաջարկեց մշակել հստակ գործիքակազմ՝ կրթության ոլորտում՝ կանխարգելման, իսկ ներքին գործերի նախարարությունում՝ արագ արձագանքման նպատակով։
«Սա պետք է լինի մեր առաջնահերթություններից մեկը։ Մենք պետք է անողոք և վճռական պայքար մղենք ընտանեկան բռնության դեմ», – եզրափակեց նախարարը։