3594 քաղաքացի օգտվել է անհուսալի վարկեր ունեցող անձանց աջակցման ծրագրից. կառավարությունն ավելացնում է ֆինանսավորումը
2 րոպեի ընթերցում
Կառավարության ապրիլի 25-ի նիստում հաստատվեց աշխատանքի և սոցիալական հարցերի նախարարության նախաձեռնած «Անհուսալի վարկեր ունեցող անձանց տնտեսական ակտիվության խթանման» միջոցառման համար լրացուցիչ ֆինանսավորման հատկացումը։
«Արմենպրես»-ի հաղորդմամբ՝ նիստի ընթացքում նախագիծը ներկայացրեց նախարարի տեղակալ Տաթևիկ Ստեփանյանը։
Նրա խոսքով՝ նախագծի նպատակն է ապահովել անհրաժեշտ ֆինանսական միջոցներ 2025 թվականի ապրիլի և մայիսի ամիսների համար։
«Այս փուլում առաջարկվում է հատկացնել 209 միլիոն դրամ՝ երկրորդ եռամսյակում վճարումներ կատարելու նպատակով»,- ասաց նա։
Նախարարի տեղակալը հիշեցրեց, որ ծրագրի շրջանակում աջակցություն է տրվում այն ֆիզիկական անձանց, որոնց բոլոր վարկերը վերջին երեք և ավելի տարիների ընթացքում դասակարգվել են որպես անհուսալի, և որոնց մայր գումարի պարտավորությունը չի գերազանցում 1 միլիոն դրամը։ Աջակցությունն իրականացվում է շահառուի աշխատավարձից հաշվարկված եկամտային հարկի ամբողջ գումարի չափով, որը փոխանցվում է վարկային պարտավորության մարմանը։ Ծրագրի տևողությունը՝ առավելագույնը 24 ամիս։
«Դիմումների ընդունումը մեկնարկել է 2025 թվականի փետրվարի 1-ից և շարունակվելու է մինչև 2026 թվականի հունվարի 31-ը։ Այս պահին արդեն հաստատվել է 3594 քաղաքացու դիմում։ Փետրվար ամսվա դիմումների հիման վրա մարտին վճարում է կատարվել 1896 շահառուի համար՝ ընդհանուր 70 միլիոն դրամի չափով։ Մարտին ծրագրին միացել է ևս 1072 շահառու, որոնց վճարումը կիրականացվի ապրիլին։
Փետրվար և մարտ ամիսների համար ընդհանուր շահառուների թիվը կկազմի 2968»,- եզրափակեց Ստեփանյանը։