2 րոպեի ընթերցում
Պաղեստինյան ՀԱՄԱՍ շարժումը պաշտոնապես մերժել է հրադադարի մասին Իսրայելի վերջին առաջարկը՝ հայտարարելով, որ պատրաստ է անհապաղ բանակցել այնպիսի համաձայնագրի շուրջ, որի արդյունքում ազատ կարձակվեն մնացած բոլոր պատանդները՝ պատերազմի ավարտի և պաղեստինցի բանտարկյալների ազատ արձակման դիմաց: «Արմենպրես»-ի փոխանցմամբ՝ այս մասին հաղորդում է BBC-ն։
«Մենք չենք ընդունի մասնակի գործարքներ, որոնք ծառայում են (խմբ.՝ Իսրայելի վարչապետ Բենիամին) Նեթանյահուի քաղաքական օրակարգին», - տեսաուղերձում ասել է ՀԱՄԱՍ-ի գլխավոր բանակցող Խալիլ ալ Հայյան։
59 պատանդ դեռ մնում է ՀԱՄԱՍ-ի մոտ գերության մեջ, նրանցից 24-ը ողջ են համարվում: Իսրայելի վերջին առաջարկը ենթադրում էր 45-օրյա հրադադար՝ 10 պատանդի ազատ արձակման դիմաց:
Մարտի 18-ից իսրայելական ուժերն ուժեղացրել են օդային, ցամաքային և ծովային ռմբակոծությունները Գազայի հատվածում և ընդլայնել ցամաքային գործողությունները։
Գազայի առողջապահության նախարարության տեղեկություններով՝ առնվազն 51 065 պաղեստինցի է զոհվել 2023 թ. հոկտեմբերի 7-ից Գազայի դեմ Իսրայելի պատերազմի հետևանքով, վիրավորվել է շուրջ 116 505-ը, որոնց թվում 1691 զոհ և 4464 վիրավոր գրանցվել է մարտի 18-ին ռազմական գործողությունների սրացումից հետո:
Իսրայելը Գազայի հատվածում ռազմական գործողություններ էր սկսել՝ ի պատասխան պաղեստինյան ՀԱՄԱՍ շարժման զինյալների ներխուժման, որի հետևանքով զոհվել էր գրեթե 1200 մարդ, գերեվարվել՝ շուրջ 250 մարդ։