Ռուսաստանն ու Ուկրաինան միմյանց մեղադրել են խաղաղ բնակավայրերին հարվածելու մեջ, կան զոհեր և վիրավորներ

Ռուսաստանն ու Ուկրաինան հայտնել են հրթիռային և ԱԹՍ-ների հարվածների հետևանքով խաղաղ բնակիչների շրջանում զոհերի և վիրավորների մասին:

«Արմենպրես»-ի հաղորդմամբ՝ ինչպես փոխանցում է «ՌԻԱ Նովոստի»-ն, ապրիլի 12-ին ուկրաինական զինված ուժերը կրակ են արձակել Լուգանսկի Ստախանով բնակավայրի ուղղությամբ, որի հետևանքով մեկ մարդ է զոհվել: Երեկոյան ևս 2 խաղաղ բնակչի զոհվելու մասին են հայտնել Դոնեցկի իշխանությունները:

Ապրիլի 13-ի ընթացքում ԱԹՍ-ների հարձակման վտանգով պայմանավորված՝ օդային տագնապ է ազդարարվել Ռուսաստանի Ռոստովի և Բելգորոդի մարզերում: Վերջինիս տեղական իշխանությունը հայտնել է մեկ մարդու վիրավորվելու մասին:

Ուկրաինայի նախագահ Վոլոդիմիր Զելենսկին «Ֆեյսբուք»-ի իր էջում կադրեր է հրապարակել և գրառում կատարել  Սումի քաղաքի հրթիռակոծման վերաբերյալ:

Ըստ նրա՝  ռուսական  բալիստիկ հրթիռի հարվածից, նախնական տվյալներով, տասնյակ մարդիկ են զոհվել ու վիրավորվել: Մեկ այլ գրառման մեջ նա նշել է, որ Սումիում զոհվել է 31 մարդ։