1 րոպեի ընթերցում
ՀՀ կառավարության որոշմամբ Մատենադարանի տնօրեն Արա Խզմալյանը նշանակվել է Հանրային խորհրդի նախագահ: «Արմենպրես»-ին այս մասին տեղեկացրին «Մատենադարան» Մ. Մաշտոցի անվան հին ձեռագրերի գիտահետազոտական ինստիտուտից։
Ըստ աղբյուրի՝ Հանրային խորհուրդը, համաձայն ՀՀ սահմանադրության 161-րդ հոդվածի, կառավարության խորհրդակցական մարմին է և գործում է հանրային խորհրդի մասին ՀՀ օրենքով սահմանված դրույթներով ու սկզբունքներով: Խորհուրդը կազմված է 45 անդամից, որոնք ներկայացնում են հանրային կյանքի տարբեր բնագավառներն ու հետաքրքրությունները, ունեն շոշափելի ու նշանակալի ներդրում իրենց բնագավառներում: Խորհրդում գործում է 15 ոլորտային մշտական հանձնաժողով:
Նշվում է, որ խորհրդի գերակա նպատակն է ապահովել լիարժեք հաղորդակցություն հանրության և ՀՀ կառավարության միջև, ձևավորել բարենպաստ միջավայր հանրային կյանքի առաջընթացում քաղաքացիների ընդգրկվածությունն ու նախաձեռնողականությունը ապահովելու համար: Հանրային խորհուրդը կողմնորոշվում է քաղաքական զսպվածության և հավասարակշռության սկզբունքով: