ՀՀ-ն պատրաստ է միջազգային փորձագետների ներգրավմամբ ստուգել Ադրբեջանին տրամադրած ականապատ տարածքների քարտեզների ճշգրտությունը

Հայաստանը պատրաստ է ստուգել Ադրբեջանին տրամադրած ականապատ տարածքների քարտեզների ճշգրտությունը միջազգային փորձագետների ներգրավմամբ:

«Արմենպրես»-ի փոխանցմամբ՝ այս մասին X-ի իր միկրոբլոգում գրել է Հայաստանի ԱԳՆ մամուլի խոսնակ Անի Բադալյանը՝ անդրադառնալով ականապատ տարածքների քարտեզների վերաբերյալ Բաքվի պահանջների մասին լրատվամիջոցների հարցմանը: 

«Կարևորելով մարդասիրական խնդիրների լուծումը՝ 2021 թվականի հունիսի 12-ին, հուլիսի 3-ին, հոկտեմբերի 19-ին, նոյեմբերի 1-ին և նոյեմբերի 29-ին Հայաստանը միակողմանիորեն, առանց նախապայմանների Ադրբեջանին տրամադրել է ականապատ տարածքների 972 գրանցամատյան»,–գրել է Բադալյանը:

Նա հավելել է՝ դեռ ավելին, հավատարիմ մնալով հումանիտար հարցերում համագործակցության սկզբունքներին՝ Հայաստանը հարցումների միջոցով կազմել և 2024 թվականի սկզբին ականապատ տարածքների նոր գրանցամատյաններ է փոխանցել Ադրբեջանին։

«Ադրբեջանը շարունակաբար կասկածի տակ է դնում այդ քարտեզների ճշգրտությունը՝ չնայած մեր բազմաթիվ հայտարարություններին, որ «ավելի լավ կամ ավելի ճշգրիտ» քարտեզներ չկան։ Հայաստանը, ինչպես նախկինում, այնպես էլ հիմա, պատրաստ է ստուգել այդ քարտեզների ճշգրտությունը միջազգային փորձագետների ներգրավմամբ»,–նշել է խոսնակը: 

ԱԳՆ-ից հիշեցրել են՝ Արդարադատության միջազգային դատարանը միանշանակ մերժել է Հայաստանի նկատմամբ ժամանակավոր միջոց կիրառելու Բաքվի պահանջը, որով Ադրբեջանը Հայաստանին մեղադրում էր ականապատման գործողությունների մեջ:  

❓Answered ⤵️ the media inquiry on official “Baku’s demands to provide #minefield maps”.

❗️Emphasizing the importance of addressing #humanitarian issues, on June 12, July 3, October 19, November 1 & November 29, 2021 #Armenia unilaterally provided #Azerbaijan with 972 registries… pic.twitter.com/2VEti09kCU

— Ani Badalyan, 🇦🇲 MFA Spokesperson (@ArmSpoxMFA) April 9, 2025

Բաքուն վերջին օրերին կրկին սկսել է մեղադրանքներ հնչեցնել Երևանի հասցեին, թե իբր Հայաստանի կողմից իրեն տրամադրված ականապատ տարածքների քարտեզները ոչ ճշգրիտ են ու պիտանի չեն։