Հայաստանում խուլիգանության դեպքերն աճել են 17.2 տոկոսով․ Երևանում նվազել են, մարզերում՝ ավելացել
1 րոպեի ընթերցում
Հայաստանում արձանագրվել է խուլիգանության դեպքերի աճ՝ 103-ով կամ 17.2 տոկոսով։
«Արմենպրես»-ի հաղորդմամբ՝ այս մասին նշված է ՀՀ գլխավոր դատախազության 2024 թվականի գործունեության հաղորդման մեջ։
Եթե 2023 թվականին գրանցվել էր 600 դեպք, ապա 2024 թվականին՝ 703 դեպք։ Դեպքերի զգալի մասը բաժանվում է հետևյալ կերպ․ 304-ը կատարվել է Երևանում, իսկ 399-ը՝ մարզերում։
Նախորդ տարվա համեմատ Երևանում խուլիգանության դեպքերը նվազել են 11-ով կամ 3.5 տոկոսով, մինչդեռ մարզերում արձանագրվել է 114-ով կամ 40 տոկոսով աճ։
Հատկանշական է այն, որ մայրաքաղաքում նվազել են հատկապես զենքի կամ մարմնական վնասվածք պատճառելու համար նախապես պատրաստված կամ հարմարեցված առարկաների գործադրմամբ կամ դրա սպառնալիքով կատարված խուլիգանության դեպքերը․ դրանք նվազել են 18-ով կամ 29.5 տոկոսով։