Իրաքը հուսով է, որ խաղաղության համաձայնագրի ստորագրումը կնպաստի Հայաստանի և Ադրբեջանի ժողովուրդների համար ավելի լավ ապագայի կերտմանը
2 րոպեի ընթերցում
Իրաքի արտաքին գործերի նախարարությունը ողջունել է Հայաստանի և Ադրբեջանի միջև խաղաղության համաձայնագրի շուրջ ձեռք բերված համաձայնությունը՝ բարձր գնահատելով այդ ուղղությամբ գործադրված դիվանագիտական ջանքերը։
«Արմենպրես»-ի հաղորդմամբ՝ այս մասին համապատասխան հայտարարություն է տարածել Իրաքի ԱԳ նախարարությունը։
«Իրաքի Հանրապետությունը ողջունում է Ադրբեջանի և Հայաստանի միջև պատմական նշանակություն ունեցող խաղաղության պայմանագրի շուրջ համաձայնեցման հասնելը»,-նշված է հայտարարության մեջ։
Իրաքի ԱԳ նախարարությունը նշել է, որ այս համաձայնագիրը լուրջ քայլ է Հարավային Կովկասի տարածաշրջանում անվտանգության և կայունության ամրապնդման ուղղությամբ և հուսով է, որ այն կնպաստի Հայաստանի և Ադրբեջանի ժողովուրդների համար ավելի լավ ապագայի կերտմանը։
«Նախարարությունը նաև բարձր է գնահատում դիվանագիտական ջանքերը, որոնք նպաստել են այս կարևոր նվաճմանը»,-ասված է հայտարարության մեջ։
Իրաքի ԱԳՆ-ն հույս է հայտնել, որ այս համաձայնագիրը Հայաստանի և Ադրբեջանի միջև բարեկամական հարաբերությունների և արդյունավետ համագործակցության նոր դարաշրջան կբացի և կամրապնդի տարածաշրջանում խաղաղ գոյակցության և կայուն զարգացման հեռանկարները։
Հայաստանն ու Ադրբեջանը մարտի 13-ին հայտարարել են, որ վերջնական համաձայնության են հասել խաղաղության համաձայնագրի նախագծի տեքստի շուրջ։ Հայաստանի արտաքին գործերի նախարարությունը հայտարարել է, որ պատրաստ է Բաքվի հետ քննարկումներ սկսել համաձայնագրի ստորագրման ժամկետների և վայրի վերաբերյալ։ Բազմաթիվ երկրներ արդեն ողջունել են Հայաստանի և Ադրբեջանի միջև համաձայնության ձեռքբերումը խաղաղության համաձայնագրի տեքստի շուրջ և հույս են հայտնել, որ այն կստորագրվի հնարավորինս շուտ։