368.59
Արաբական պետությունների լիգան ողջունել է Հայաստանի և Ադրբեջանի միջև խաղաղության համաձայնագրի վերաբերյալ հայտարարությունը
2 րոպեի ընթերցում
Արաբական պետությունների լիգան ողջունել է Հայաստանի և Ադրբեջանի միջև խաղաղության համաձայնագրի վերաբերյալ հայտարարությունը` այն համարելով անհրաժեշտ և կարևոր քայլ երկու երկրների միջև հակամարտությունը դադարեցնելու և կովկասյան տարածաշրջանում տևական խաղաղության հասնելու համար: «Արմենպրես»-ի փոխանցմամբ՝ այս մասին հայտնում է Արաբական պետությունների լիգայի կայքը։
Արաբական պետությունների լիգայի գլխավոր քարտուղարությունը հաստատել է իր լիակատար աջակցությունը համաձայնագրին, որը սահմանում է վեճերը խաղաղ ճանապարհով լուծելու և կարգավորելու հիմքերը։
Գլխավոր քարտուղարության ներկայացուցիչը հույս է հայտնել վերջնական, համապարփակ խաղաղության համաձայնագրի շուտափույթ ստորագրման վերաբերյալ, որը կանդրադառնա երկու կողմերի միջև առկա բոլոր չլուծված հարցերին՝ հավելելով, որ դիվանագիտական երկխոսությունը մնում է ձգձգվող հակամարտության կարգավորման միակ կենսունակ ճանապարհը:
Հայաստանն ու Ադրբեջանը մարտի 13-ին հայտարարել են, որ վերջնական համաձայնության են հասել խաղաղության համաձայնագրի նախագծի տեքստի շուրջ։ Հայաստանի արտաքին գործերի նախարարությունը հայտարարել է, որ պատրաստ է Բաքվի հետ քննարկումներ սկսել համաձայնագրի ստորագրման ժամկետների և վայրի վերաբերյալ։ Բազմաթիվ երկրներ արդեն ողջունել են Հայաստանի և Ադրբեջանի միջև համաձայնության ձեռքբերումը խաղաղության համաձայնագրի տեքստի շուրջ և հույս են հայտնել, որ այն կստորագրվի հնարավորինս շուտ։
Բաժանորդագրվեք մեր ալիքին Telegram-ում