2 րոպեի ընթերցում
Պերուի նախկին նախագահ Պեդրո Կաստիլիոն, որը գտնվում է բանտում խռովության կազմակերպման մեղադրանքով, հացադուլ է հայտարարել՝ ի նշան բողոքի իր նկատմամբ դատավարության դեմ։ «Արմենպրես»-ի փոխանցմամբ՝ այս մասին հաղորդագրություն է տարածվել X սոցիալական հարթակի նրա էջում։
«Ի նշան բողոքի քաղաքականացված դատավարության և խռովության ու այլ հանցագործությունների գործով պատրաստվող դատավճռի դեմ, որոնք ես չեմ կատարել, ես հացադուլ եմ հայտարարում», - գրված է հաղորդագրության մեջ։
Գրությանը կցված է ձեռագիր նամակի լուսանկարը՝ նմանատիպ հայտարարությամբ, որտեղ նաև դրված է Կաստիլիոյի փաստաբանի ստորագրությունը։ Այդ տեքստում նախկին նախագահն իր հետ կատարվածն անվանում է անարդարություն։
Պերուի նախկին ղեկավարը հացադուլ է հայտարարել իր գործով լսումների սկսվելուց մեկ շաբաթ անց։
2022 թ. դեկտեմբերի 7-ին Պերուի նախագահի պաշտոնն զբաղեցնող Կաստիլիոն հայտարարել էր Կոնգրեսի (միապալատ խորհրդարանի) արձակման և պարետային ժամի սահմանման մասին։ Նա ուղերձով հանդես էր եկել խորհրդարանի նիստից առաջ, որտեղ քննարկվում էր նրա իմփիչմենթի հարցը կոռուպցիայի մեղադրանքի պատճառով:
Պատգամավորները չեն չեղարկել քվեարկությունը և հավանություն են տվել նախագահին իր լիազորություններից զրկելուն։ Զինված ուժերն ու ոստիկանությունն աջակցել են Կոնգրեսին։ Կաստիլիոն ձերբակալվել է խռովության կազմակերպման մեղադրանքով, դատախազությունը նրա համար պահանջել է 34 տարվա ազատազրկում։ Պետության ղեկավար է դարձել Դինա Բոլուարտեն, որն զբաղեցնում էր փոխնախագահի պաշտոնը: