391.22
ՀՀ ԶՈՒ գլխավոր շտաբի պետը Հունաստանի գործընկերոջ հետ քննարկել է երկկողմ և Կիպրոսի հետ եռակողմ պաշտպանական համագործակցության հարցեր
1 րոպեի ընթերցում
ՀՀ պաշտպանության նախարարի առաջին տեղակալ, ԶՈՒ ԳՇ պետ, գեներալ-լեյտենանտ Էդվարդ Ասրյանի գլխավորած պատվիրակությունը պաշտոնական այցով Հունաստանի Հանրապետությունում է՝ Հունաստանի ազգային պաշտպանության գլխավոր շտաբի պետ, գեներալ Դիմիտրոս Խուպիսի հրավերով:
Ինչպես «Արմենպրես»-ին տեղեկացրին ՀՀ պաշտպանության նախարարությունից, փետրվարի 27-ին տեղի է ունեցել գեներալ-լեյտենանտ Էդվարդ Ասրյանի դիմավորման պաշտոնական արարողությունը՝ պատվոպահակայինների և նվագախմբի մասնակցությամբ: Հնչել են երկու երկրների պետական օրհներգերը:
Գլխավոր շտաբների պետերի առանձնազրույցին հաջորդել է ընդլայնված կազմերով հանդիպումը:
Ըստ աղբյուրի՝ քննարկվել են պաշտպանության ոլորտում Հայաստան-Հունաստան համագործակցությանն առնչվող մի շարք հարցեր: Կողմերը, բարձր գնահատելով համագործակցության ընթացքը, անդրադարձ են կատարել նախորդիվ իրականացված աշխատանքներին, նախանշվել են առաջիկա անելիքները:
Քննարկվել են նաև պաշտպանության բնագավառում Հայաստան-Հունաստան-Կիպրոս եռակողմ ձևաչափով համագործակցությանը վերաբերող հարցեր:
Նշվում է, որ զրուցակիցները մտքեր են փոխանակել տարածաշրջանային անվտանգության հարցերի շուրջ:
Բաժանորդագրվեք մեր ալիքին Telegram-ում