1 րոպեի ընթերցում
Չինաստանը մահապատժի է ենթարկել տղամարդուն, որը մեղավոր էր ճանաչվել 2024 թ. նոյեմբերին 35 մարդու սպանության մեջ՝ մեքենայով վրաերթի ենթարկելու միջոցով։ «Արմենպրես»-ի փոխանցմամբ՝ այս մասին հաղորդում է Xinhua գործակալությունը։
62-ամյա Ֆան Վեյքյուն հարձակման ընթացքում նաև վիրավորել էր տասնյակ մարդկանց, երբ մեքենան վարել էր Չժուհայ քաղաքի մարզադաշտի մոտ մարզվող մարդկանց բազմության մեջ։
Ֆան Վեյքյուն մեղավոր էր ճանաչվել և մահապատժի դատապարտվել դեկտեմբերին։
Ըստ չինական պետական լրատվամիջոցների՝ ևս մեկ տղամարդ մահապատժի է ենթարկվել մեկ այլ հանցագործության համար, որն իրականացրել էր վերոնշյալ հանցագործությունից օրեր անց։ 21-ամյա Շու Ջիաջինը դանակահարության միջոցով սպանել էր 8 մարդու Վուքսի քաղաքի համալսարանում։
Ըստ Չինաստանի իշխանությունների՝ Ֆան Վենքյուն հանցագործությունն իրականացրել էր, քանի որ դժգոհ էր այն բանից, թե ինչպես է ապահարզանից հետո բաժանվել իր ունեցվածքը, իսկ Շու Ջիաջինը հարձակումն իրագործել է, քանի որ չի կարողացել դիպլոմ ստանալ քննությունները վատ հանձնելու պատճառով։