2 րոպեի ընթերցում
ԵՐԵՎԱՆ, 10 ՀՈՒՆՎԱՐԻ, ԱՐՄԵՆՊՐԵՍ: ՌԴ նախագահ Վլադիմիր Պուտինը և ԱՄՆ-ի ընտրված նախագահ Դոնալդ Թրամփը հանդիպելու պատրաստակամություն են հայտնում, սակայն այս ուղղությամբ կոնկրետություններ դեռ չկան: Ինչպես «Արմենպրես»-ը տեղեկանում է «Ինտերֆաքս» գործակալությունից, այդ մասին հայարարել է ՌԴ ղեկավարի մամուլի քարտուղար Դմիտրի Պեսկովը։ Նա նաև նշել է, որ երկու քաղաքական առաջնորդների հանդիպման համար նախապայմաններ պետք չեն։
«Նախագահ Պուտինը քանիցս հայտարարել է, որ պատրաստ է միջազգային առաջնորդների, այդ թվում՝ Դոնալդ Թրամփի հետ շփումներին: Նախագահն ինքը քանիցս ասել է այդ մասին, մենք քանիցս ասել ենք այդ մասին: Դրա համար պայմաններ չեն պահանջվում: Պահանջվում է երկխոսություն վարելու երկկողմ ցանկություն և քաղաքական կամք՝ երկխոսության միջոցով լուծելու առկա խնդիրները»,- լրագրողներին ասել է Պեսկովը։
«Մենք տեսնում ենք, որ պարոն Թրամփը նույնպես հայտարարում է երկխոսության միջոցով խնդիրները լուծելու իր պատրաստակամության մասին: Մենք ողջունում ենք դա»,- ընդգծել է նա։
Պեսկովի խոսքով՝ հանդիպման կազմակերպման հետ կապված «ոչ մի կոնկրետություն չկա»։ «Մենք ելնում ենք հանդիպման հարցում փոխադարձ պատրաստակամությունից: Ամենայն հավանականությամբ, երբ պարոն Թրամփը կմտնի Օվալաձև աշխատասենյակ, ինչ-որ տեղաշարժեր կլինեն»,- ասել է Կրեմլի խոսնակը։
Պուտինի և Չինաստանի նախագահ Սի Ծինփինի հետ եռակողմ հանդիպման պատրաստակամության մասին Թրամփի հայտարարությունը մեկնաբանելու լրագրողների խնդրանքին Պեսկովը պատասխանել է, որ այս հարցում էլ կոնկրետություններ չկան։