1 րոպեի ընթերցում
ԵՐԵՎԱՆ, 10 ՀՈՒՆՎԱՐԻ, ԱՐՄԵՆՊՐԵՍ: Հայաստանի կանանց բռնցքամարտի հավաքականի անդամ, Եվրոպայի չեմպիոն ու բրոնզե մեդալակիր Անի Հովսեփյանն աշխարհի առաջնությանը կնախապատրաստվի Անգլիայում:
«Արմենպրես»-ի հետ զրույցում այս մասին հայտնեց բռնցքամարտիկը:
«Բռնցքամարտի աշխարհի առաջնությանն Անգլիայում նախապատրաստվելու գաղափարը պատկանում է իմ անձնական մարզիչ Վաչե Վարդանյանին: Այս կերպ առավել լուրջ կնախապատրաստվեմ աշխարհի առաջնությանը»,-ասաց Հովսեփյանը:
Վերջինիս խոսքով` Անգլիան է ընտրվել նախապատրաստական փուլերից մեկի վայր, քանի որ Վաչե Վարդանյանը ծանոթ է այնտեղ աշխատող մարզիչներին:
«Անգլիայում նույն քաշում հանդես եկող փորձնական մենամարտերի խնդիր չեմ ունենա, ինչն այժմ առկա է այստեղ: Ինչպես նաև ուզում եմ ծանոթանալ պրոֆեսիոնալ բռնցքամարտիկների աշխատանքին: Միաժամանակ ցանկություն ունեմ նաև փորձնական մենամարտեր անցկացնել պրոֆեսիոնալ բռնցքամարտով զբաղվող աղջիկների հետ»,-առանձնացրեց բռնցքամարտիկը:
Հովսեփյանն ընդգծեց, որ Անգլիա մեկնում է սեփական մարզչի միջոցներով: Աշխարհի առաջնության նախապատրաստական առաջին փուլը կտևի հունվարի 12-ից փետրվարի 2-ը: Այնուհետ բռնցքամարտիկը կմիանա ազգային թիմի նախապատրաստական փուլին: