Ծաղկաձորում օրենքի խախտմամբ օտարված հողամասերը վերադարձվել են պետությանը

ԵՐԵՎԱՆ, 28 ԴԵԿՏԵՄԲԵՐԻ, ԱՐՄԵՆՊՐԵՍ։ Կոտայքի մարզի Ծաղկաձոր համայնքում շուրջ 645 միլիոն դրամ արժողությամբ երկու հողամաս վերադարձվել է պետությանը։ Այս մասին «Արմենպրես»-ին տեղեկացրին ՀՀ գլխավոր դատախազության հանրային կապերի բաժնից։

2024 թվականի դեկտեմբերի 27-ին Հայաստանի Հանրապետության սեփականության իրավունքն է գրանցվել Մ. Մկրտչյան փողոցի 32/1 (26,700 քմ մակերես, 431 միլիոն 915 հազար դրամ շուկայական արժեքին մոտարկված կադաստրային արժեք) և 36/1 (26,400 քմ մակերես, 213 միլիոն 531 հազար 120 դրամ շուկայական արժեքին մոտարկված կադաստրային արժեք) հասցեների հողամասերի նկատմամբ։

Հակակոռուպցիոն դատարանը 2024 թվականի հունվարի 12-ին բավարարել էր Գլխավոր դատախազության պետական շահերի պաշտպանության վարչության հայցը։ Դատախազությունը պահանջել էր անվավեր ճանաչել 2007 թվականին կայացած աճուրդները, որոնց արդյունքում հողամասերը օտարվել էին օրենքի խախտմամբ։

Դատարանի որոշմամբ կիրառվել են անվավերության հետևանքներ, և հողամասերը վերադարձվել են պետությանը։