Յոլյանի անվան արյունաբանական կենտրոնում բուժվող երեխաները Աննա Հակոբյանի անունից ստացել են ամանորյա նվերներ

ԵՐԵՎԱՆ, 28 ԴԵԿՏԵՄԲԵՐԻ, ԱՐՄԵՆՊՐԵՍ։ ՀՀ վարչապետի տիկին Աննա Հակոբյանի օգնականներ Վարդուհի Մանուկյանն ու Լիլիա Բադալյանը դեկտեմբերի 27-ին այցելել են պրոֆեսոր Ռ.Հ. Յոլյանի անվան արյունաբանական կենտրոն և Աննա Հակոբյանի անունից նվերներ են հանձնել բուժվող երեխաներին: «Արմենպրես»-ի հաղորդմամբ՝ այս մասին հաղորդագրություն է տարածել Աննա Հակոբյանի գրասենյակը։

Թեև վարչապետի տիկինը COVID-19-ով վարակված չէ, իսկ ԱՆ 2020 թվականի օգոստոսի 4-ի թիվ 17-Ն հրամանի համաձայն կոնտակտավորների մեկուսացում այլևս չի պահանջվում, այնուամենայնիվ, այս տարի Աննա Հակոբյանը խախտել է ավանդույթը և չի այցելել փոքրիկների Նոր տարին և Սուրբ Ծնունդը շնորհավորելու։

Յոլյանի անվան արյունաբանական կենտրոնում այս պահին բուժում է ստանում 56 երեխա, որոնցից 21-ը` ստացիոնար:

Աննա Հակոբյանը շնորհավորել է բոլորին, մաղթել շուտափույթ և լիարժեք ապաքինում: Վարչապետի տիկինը նաև հատուկ շնորհակալություն է հայտնել Պրոֆեսոր Ռ. Հ. Յոլյանի անվան արյունաբանական կենտրոնի բժիշկներին, որոնք անմնացորդ նվիրված են իրենց առաքելությանը և ջանք չեն խնայում երեխաներին բուժելու համար: