Հայաստանում նկատվում է սուր շնչառական վարակների աճ

ԵՐԵՎԱՆ, 28 ԴԵԿՏԵՄԲԵՐԻ, ԱՐՄԵՆՊՐԵՍ։ Հայաստանի Հանրապետությունում նկատվում է սուր շնչառական վարակների, մասնավորապես ՍՇՎ-ով և թոքաբորբով հոսպիտալացումների, շտապ օգնության կանչերի շրջանում աճ։ «Արմենպրես»-ի հաղորդմամբ՝ այս մասին տեղեկացնում է Հիվանդությունների վերահսկման և կանխարգելման ազգային կենտրոնը։

Համաձայն լաբորատոր հետազոտությունների արդյունքների՝ Հանրապետությունում շարունակվում է գրիպի Ա տեսակի H1pdm09 ենթատեսակի շրջանառությունը: 

Ամանորյա տոնական օրերին ստեղծվում են նպաստավոր պայմաններ, հատկապես մարդաշատ վայրերում ՍՇՎ-ների, գրիպի տարածման համար, քանի որ վարակը տարածվում է օդակաթիլային ճանապարհով։ 

Առողջապահության նախարարությունը կրկին հորդորում է․

խուսափե´լ սուր շնչառական վարակին բնորոշ ախտանշաններով հիվանդների հետ շփումից,

հիվանդության դեպքում՝ մնալ տանը,

մարդաշատ վայրերում գտնվելիս կրել դիմակ,

հիվանդության դեպքում հրավիրել տեղամասային մանկաբույժին, թերապևտին կամ ընտանեկան բժշկին և  չզբաղվել ինքնաբուժմամբ,

չօգտագործեք հակաբիոտիկներ, քանի որ դրանք ցուցված չեն գրիպի բուժման համար,

հագնվե´լ եղանակին համանունչ,

պահպանե´լ հազի և փռշտալու վարվելակարգը,

օգտագործե´լ հնարավորինս շատ հեղուկներ,

հաճախակի օդափոխե´լ փակ տարածքները,

հետևե´լ անձնական հիգիենային: