Ռուսական արվեստի թանգարանն արվեստասերներին կներկայացնի «Կշեռք» պատմագեղարվեստական ցուցահանդեսը
2 րոպեի ընթերցում
ԵՐԵՎԱՆ, 25 ԴԵԿՏԵՄԲԵՐԻ, ԱՐՄԵՆՊՐԵՍ: Ռուսական արվեստի թանգարանի «Կշեռք» պատմագեղարվեստական ցուցահանդեսում կներկայացվեն վաղ միջնադարից մինչև 20-րդ դարի կեսերի կշեռքներ Հայաստանի տարբեր թանգարաններից և մասնավոր հավաքածուներից։
«Արմենպրես»-ի հաղորդմամբ՝ ցուցահանդեսի բացման հանդիսավոր արարողությունը տեղի կունենա դեկտեմբերի 28-ին։
Այցելուները հնարավորություն կունենան ծանոթանալու կշեռքի պատմությանը, խորհրդաբանությանը, ձևերին և կիրառման եղանակներին։
Կշեռքի խորհուրդը կներկայացվի միջնադարյան մանրանկարչության, քանդակագործության օրինակներով, իսկ Սերգեյ Փարաջանովի և Հակոբ Հակոբյանի ստեղծագործությունները յուրովի կմեկնաբանեն կշեռքի գեղարվեստական իմաստաբանությունը։
Այս ցուցահանդեսը միջթանգարանային համագործակցության լավագույն օրինակ է, որտեղ ներկայացվում են կշեռքներ Հայաստանի պատմության թանգարանի, Հայոց ազգագրության և ազատագրական պայքարի պատմության ազգային թանգարանի, Երևան քաղաքի պատմության թանգարանի, Ե. Չարենցի անվ. գրականության և արվեստի թանգարանի, Միջին արևելքի թանգարանի, Մ. Մաշտոցի անվ. Մատենադարանի, Սերգեյ Փարաջանովի թանգարանի, կոլեկցոներներ Նարեկ Վան Աշուղաթոյանի, Հակոբ Մոմջյանի, Գալամքերյանների և Հրազդան Թոքմաջյանի հավաքածուներից։
Ցուցահանդեսը կգործի մինչև 2025-ի ապրիլի 1-ը։ Ամբողջ ընթացքում կկազմակեպվեն թեմատիկ դասախոսություններ, կրթական ծրագրեր։