2 րոպեի ընթերցում
ԵՐԵՎԱՆ, 20 ԴԵԿՏԵՄԲԵՐԻ, ԱՐՄԵՆՊՐԵՍ։ ՀՀ առողջապահության նախարարության մշակած նոր նախագծով առաջարկվում է հստակեցնել սեռաբջիջների և սաղմերի ներմուծման և արտահանման հետ կապված իրավահարաբերությունները՝ համապատասխանեցնելով գործող օրենսդրությանը։ «Արմենպրես»-ի հաղորդմամբ՝ նախագիծը հրապարակվել է e-draft իրավական ակտերի, նախագծերի միասնական կայքում։
Նախագիծը նախատեսում է նաև սահմանել կենսաբանական ծնողի (ծնողների) գրավոր համաձայնության և բժշկական օգնության և սպասարկման համապատասխան տեսակի լիցենզիա ունեցող բժշկական կազմակերպության տրամադրած տեղեկանքի ձևերը։
Փոփոխություններն անհրաժեշտ են՝ հաշվի առնելով «Մարդու վերարտադրողական առողջության և վերարտադրողական իրավունքի մասին» օրենքի վերջին լրացումները։ Օրենքով պահանջվում է սահմանել սեռաբջիջների և սաղմերի ներմուծման ու արտահանման համար դիմելու փաստաթղթերի հստակ ցանկը և կարգավորել այդ գործընթացները։
Նախագծի ընդունմամբ կստեղծվի կանոնակարգված և իրավական հիմքով համապատասխանեցված դաշտ սեռաբջիջների և սաղմերի ներմուծման ու արտահանման գործընթացների համար։ Կսահմանվեն փաստաթղթերի ներկայացման պահանջները, այդ թվում՝ անհրաժեշտ տեղեկանքի և գրավոր համաձայնության ձևերը։
Նախագծի ընդունումը պետական բյուջեում ծախսերի և եկամուտների ավելացում չի նախատեսում։