Սիրիայի և Ռուսաստանի ավիացիան հարվածներ է հասցրել գրոհայիններին Իդլիբում և Համայում. SANA

ԵՐԵՎԱՆ, 3 ԴԵԿՏԵՄԲԵՐԻ, ԱՐՄԵՆՊՐԵՍ։ Սիրիայի և Ռուսաստանի ռազմական ինքնաթիռները համատեղ հարվածներ են հասցրել Իդլիբի և Համայի նահանգներում հակակառավարական ուժերին։ «Արմենպրես»-ի փոխանցմամբ՝ այս մասին հաղորդում է սիրիական պետական SANA լրատվական գործակալությունը՝ վկայակոչելով ռազմական գերատեսչությունը։

Ըստ հրապարակման՝ հրթիռային հարվածների արդյունքում զոհվել և վիրավորվել են տասնյակ գրոհայիններ, ոչնչացվել են նաև նրանց մեքենաները և զենքերը։

Իր հերթին Mehr գործակալությունը հաղորդում է, որ սիրիական բանակը հետ է գրավել Համայի կարևոր մայրուղիներից մեկը, ինչպես նաև դրա շուրջ գտնվող քաղաքները և գյուղերը։ Տեղի աղբյուրներին հղում անելով՝ գործակալությունը նշում է, որ Համայում մի քանի ժամվա ընթացքում սիրիական բանակին է միացել շուրջ 15 000 կամավոր։

Բացի այդ, ինչպես ավելի վաղ հաղորդել էր Reuters գործակալությունը, Իրանի կողմից աջակցվող իրաքցի հարյուրավոր մարտիկներ Սիրիա են մեկնել՝ կառավարական զորքերին գրոհայինների դեմ պայքարում օգնելու համար։