Քաղաքաշինության կոմիտեն մշակում է շինարարության գնագոյացման նոր հայեցակարգ

ԵՐԵՎԱՆ, 20 ՆՈՅԵՄԲԵՐԻ, ԱՐՄԵՆՊՐԵՍ։ Մշակման փուլում է շինարարության գնագոյացման հայեցակարգը, որով նախատեսվում է հրաժարվել Խորհրդային Միության տարիներից գործող տարրային նորմերից և գնագոյացման հիմքում ընդունել շուկայական արժեքները։

«Արմենպրես»-ի հաղորդմամբ՝ այս մասին լրագրողների հետ ճեպազրույցում ասաց ՀՀ քաղաքաշինության կոմիտեի նախագահ Եղիազար Վարդանյանը՝ ընդգծելով, որ գնագոյացման խնդիրը տարիներ շարունակ շինարարության ոլորտում ամենաքննարկվածներից է։

«Գնագոյացման նոր հայեցակարգ ենք մշակում, որը ներկայացվել է գերատեսչությունների քննարկմանը և առաջիկայում կներկայացվի նաև կառավարության քննարկմանն ու  հաստատմանը։ Էությունը կայանում է նրանում, որ մինչև հիմա շինարարական նախահաշիվները կազմվում էին դեռևս խորհրդային տարիներից սահմանված տարրային նորմերով, որոնք ձևափոխումներով, գործակիցների միջոցով բերվում-հասցվում էին այսօրվա գներին, որն, իհարկե, չէր արտացոլում ներկայիս իրական շինարարության ոլորտում ձևավորված շուկայական արժեքները։ Նոր հայեցակարգով նախատեսված է անցում կատարել շուկայական գնագոյացմանը, այսինքն, ըստ էության, այն, ինչը տարիներ շարունակ կատարվում էր մասնավոր ոլորտում, արտացոլել ենք պետական պատվերով իրականացվող շինարարությունների համար»,-պարզաբանեց Վարդանյանը։

Նրա խոսքով՝ գործընթացի առաջին փուլով կհաստատվի գնագոյացման հայեցակարգը, իսկ երկրորդով նախահաշիվների կազմման նորմերը, որն իր մեջ կներառի թե շինանյութերի, թե շինարարական աշխատանքների գնագոյացման մեթոդաբանությունը։