ՏՏ ոլորտի փորձառու մասնագետներն ու գիտնականները՝ մեկ հարթակում. Երևանում մեկնարկել է IEEE EWDTS 2024 միջազգային սիմպոզիումը
4 րոպեի ընթերցում
ԵՐԵՎԱՆ, 13 ՆՈՅԵՄԲԵՐԻ, ԱՐՄԵՆՊՐԵՍ: Երևանում մեկնարկել է 20-րդ «Արևելք-Արևմուտք, Նախագծում և թեսթավորում» (IEEE EWDTS 2024) միջազգային սիմպոզիումը:
«Արմենպրես»-ի հաղորդմամբ՝ արդեն չորրորդ անգամն է, որ Հայաստանը հյուրընկալում է այս սիմպոզիումը, որը համախմբում է տեղեկատվական տեխնոլոգիաների ոլորտի փորձառու մասնագետներին և գիտնականներին ամբողջ աշխարհից. այն կանցկացվի նոյեմբերի 13-17-ը:
IEEE EWDTS 2024 սիմպոզիումի հիմնական նպատակն է ներկայացնել և տարածել էլեկտրոնային սխեմաների և համակարգերի ավտոմատացված նախագծման, ինչպես նաև թեստավորման, ախտորոշման և վերանորոգման ոլորտում առկա միտումներն ու առաջընթացները Արևելյան և Արևմտյան Եվրոպայի, Հյուսիսային Ամերիկայի, ինչպես նաև աշխարհի այլ մասերից առաջատար և փորձառու մասնագետների և գիտնականների կողմից։ Սիմպոզիումի լիագումար նիստերին կներկայացվեն մի քանի տասնյակ ելույթներ և զեկույցներ:
Հայաստանի Բարձր տեխնոլոգիական արդյունաբերության նախարարի տեղակալ Ռուբեն Սիմոնյանը նշեց՝ նման կարևորության և մասշտաբի սիմպոզիումի անցկացումը Հայաստանում կրկին անգամ ընդգծում է Հայաստանի դերակատարումը բարձր տեխնոլոգիաների ոլորտի համաշխարհային առաջընթացի մեջ։
«Հայաստանը ոգևորված է հյուրընկալելու այնպիսի հեղինակավոր սիմպոզիում, ինչպիսին IEEE EWDTS 2024-ն է։ Մեր երիտասարդ ճարտարագետներն ու գիտա- կրթական համայնքը փայլուն հնարավորություն կունենան աշխարհի առաջատար մասնագետներից տեղեկանալու ամենաառաջադեմ զարգացումների մասին, գիտելիքներ փոխանակելու և ընդլայնելու իրենց մասնագիտական ցանցը՝ ստեղծելով նոր կապեր»,- նշեց Սիմոնյանը։
IEEE EWDT սիմպոզիումի նախագահ, «Սինոփսիս»-ի առաջատար գիտնական և «Սինոփսիս Արմենիա»-ի նախագահ Երվանդ Զորյանը հատկանշական է համարում, որ այս տարի EWDTS 24-ի նիստերի մի մասը կանցկացվեն «Միկրոէլեկտրոնիկայի միջազգային ֆորումի» (MIF-ի) հետ համատեղ, ինչը կկրկնապատկի միջոցառման ներգրավվածությունն ու ազդեցությունը:
«Այս տարի IEEE EWDTS 2024-ը մեկ հարթակում կհավաքի ներկայացուցիչների 14 երկրներից, որոնք կկիսվեն իրենց գիտելիքներով և փորձով։ Նման ֆորումներն անչափ կարևոր են համաշխարհային ճանաչում ունեցող փորձագետների շրջանում չիպերի նախագծման և թեստավորման վրա նման շարունակական տեխնոլոգիական առաջընթացի ազդեցությունը քննարկելու համար»,- ասաց Երվանդ Զորյանը։
IEEE EWDTS 2024-ը ընդգրկում է անալոգային, խառը ազդանշանի և ռադիոհաճախականության թեստավորում, վերլուծություն և օպտիմալացում, վեկտորների ավտոմատ ստեղծում և համակարգի մակարդակի թեստավորում, ներկառուցված ինքնաթեստավորում, անսարքությունների վերացում և ախտորոշում ու այլ թեմաներ։
East-West Design & Test սիմպոզիումի հովանավորն է IEEE CS-ը (Computer Society): IEEE-ն՝ Էլեկտրոնային և էլեկտրոնիկայի ճարտարագետների ինստիտուտը, միջազգային հեղինակություն ունեցող աշխարհի ամենամեծ մասնագիտական կառույցն է, որի գործունեությունը նվիրված է տեխնոլոգիաների առաջխաղացմանը՝ ի շահ մարդկության։ Այս տարի սիմպոզիումի աջակիցներն են՝ UEICT-ն (ՏՀՏ գործատուների միությունը) և Synopsys SARA (Synopsys Academic & Research Alliances) ծրագիրը, որի նպատակն է ճարտարագետների հաջորդ սերնդին աշխատանքային շուկա և հետազոտական լաբորատորիաներ ներգրավելու համար անհրաժեշտ հետաքրքրությունների և հմտությունների զարգացումը: