Նախարարը սուբվենցիոն ծրագրերի ֆինանսավորման կրճատումը կապում է համայնքների ինքնուրույնությունը խթանելու հետ

3 րոպեի ընթերցում

ԵՐԵՎԱՆ, 12 ՆՈՅԵՄԲԵՐԻ, ԱՐՄԵՆՊՐԵՍ։ Ազգային ժողովում 2025 թվականի պետական բյուջեի նախագծի քննարկման ընթացքում անդրադարձ կատարվեց համայնքներին տրամադրվող սուբվենցիաների և դրամաշնորհների կրճատման հարցին։ 

«Արմենպրես»-ի հաղորդմամբ՝ «Հայաստան» խմբակցության պատգամավոր Գեղամ Նազարյանը հարց ուղղեց ֆինանսների նախարար Վահե Հովհաննիսյանին՝ անդրադառնալով համայնքներին տրամադրվող սուբվենցիաների և դրամաշնորհների զգալի կրճատմանը, որն արտացոլված է 2025 թվականի բյուջեի նախագծում։

Ի պատասխան ՝ ֆինանսների նախարար Վահե Հովհաննիսյանը նշեց, որ համայնքների ֆինանսավորման կառուցվածքի փոփոխությունները բխում են համայնքների ինքնուրույնությունը խթանելու տրամաբանությունից։ Նա պարզաբանեց, որ վերջին շրջանում դոտացիաներն աճել են 13 միլիարդ դրամով։

«Մեր տրամաբանությունն այն է, որ, քանի որ 13 միլիարդ դրամով ավելացել են դոտացիաները, այսինքն՝ ավելանում են համայնքների եկամուտները, կարծում ենք, որ համայնքներն ունեն ինքնուրույն ծրագրեր իրականացնելու ավելի մեծ կարողություններ»,-ասաց Հովհաննիսյանը։

Նախարարը շեշտեց, որ սուբվենցիաների նպատակը կառավարության կողմից համայնքներին աջակցելն է այն իրավիճակում, երբ նրանք չունեն բավարար եկամուտներ։ Այժմ, ըստ Հովհաննիսյանի, համայնքներն ավելի մեծ կարողություններ ունեն ինքնուրույն ծրագրեր իրականացնելու համար։ Դա տեղի է ունեցել նաև վերջին տարիներին իրականացված օրենսդրական փոփոխությունների շնորհիվ, որոնք նպաստել են համայնքների եկամուտների աճին։

«Այս առումով հնարավորությունները մեծանում են, բայց, իհարկե, տարվա ընթացքում, եթե նկատել եք, պլանավորում ենք սուբվենցիաների տրամադրման ինչ-որ գումարներ, հետո տրամադրում ենք դրանից շատ ավելի շատ, երբ տեսնում ենք, որ ծրագրերը որակյալ կատարվում են»,- հավելեց Հովհաննիսյանը։ 

Պատգամավոր Գեղամ Նազարյանը արձագանքեց նախարարի մեկնաբանությանը՝ նշելով, որ դրամաշնորհների չափն էլ է զգալիորեն նվազել՝ մոտ 3-4 միլիարդ դրամով։

«Ցավոք, Ձեր պատկերացումները գյուղական բնակավայրերի մասին չեն համապատասխանում այն իրականությանը, որն ունենք։ Եվ այս առումով կառաջարկեմ, որ ավելի լավ ուսումնասիրեք գյուղերում առկա վիճակը և սուբվենցիոն ծրագրերն այնպիսիք լինեն, որ հետո հիմք դառնան, որ համայնքներն ինքնուրույն կարողանան ինչ-որ ծրագրեր իրականացնել»,- եզրափակեց Նազարյանը։ 

Հայերեն

Եվրամիությունը պատժամիջոցներ է սահմանել գրեթե 50 ռուսական բանկի նկատմամբ

ԶՊՄԿ-ն երկրորդ տարին անընդմեջ մասնակցում է CaseKey ծրագրին՝ ուսանողներին հնարավորություն տալով բացահայտել ՀՀ արդյունաբերությունը

«Նաիրի» ԲԿ-ում բացվեց ժամանակակից բժշկության առաջադեմ լուծումներով հագեցած Սրտանոթային ինտերվենցիոն կենտրոն

Իրաքն արգելափակել է Telegram-ը՝ Հորդանանի նմանատիպ քայլից հետո

Արարատ Միրզոյանը Բրյուսելում հանդիպել է Հունաստանի արտաքին գործերի նախարարի հետ

Լավրովն Արաղչիի հետ հեռախոսազրույցում քննարկել է իրավիճակը Մերձավոր Արևելքում

Բարսելոնայում ոստիկանությունը ցրել է բնակարանային ճգնաժամի դեմ բողոքողների ճամբարը

Նույնակացման միջոցներով դրոշմավորման փորձնական ծրագրեր են իրականացվում 6 հիմնական ապրանքախմբի համար․ ՊԵԿ

ՀՀ ԿԲ. թանկարժեք մետաղների գներ և փոխարժեքներ -16/11/26

Ասիական ինդեքսներ - 16/11/26