Կախված է բանակցային դինամիկայից. Հայաստանը COP29-ին մասնակցել-չմասնակցելու որոշում դեռ չունի

ԵՐԵՎԱՆ, 11 ՆՈՅԵՄԲԵՐԻ, ԱՐՄԵՆՊՐԵՍ: Հայաստանը Բաքվում արդեն մեկնարկած COP-29 համաժողովին մասնակցել-չմասնակցելու վերաբերյալ որոշում դեռ չունի։ 

«Արմենպրես»-ի փոխանցմամբ՝ այս մասին լրագրողների հետ զրույցում ասաց Հայաստանի արտաքին գործերի նախարարի տեղակալ Վահան Կոստանյանը: 

«Դեռ որոշում չունենք: Երբ լինի որոշում, պատշաճ կերպով կտեղեկացնենք»,–ասաց Կոստանյանը:

Նա վերահաստատեց՝ մասնակցել-չմասնակցելու որոշումը կախված է Հայաստան-Ադրբեջան բանակցային դինամիկայից:  

Բաքվում նոյեմբերի 11-ին մեկնարկել է և մինչև նոյեմբերի 22-ը կշարունակվի COP29 համաժողովը: Համաշխարհային մի խումբ  առաջնորդներ տարբեր պատճառներով հրաժարվել են մասնակցել համաժողովին: Միջազգային մի խումբ գործիչներ Ադրբեջանին կոչ էին արել COP29-ին ընդառաջ ազատել բոլոր հայ գերիներին: Եվրախորհրդարանը հոկտեմբերի 24-ին ընդունած բանաձևում ԵՄ-ին կոչ էր արել COP-29-ին ընդառաջ Ադրբեջանի վրա ճնշումներն ավելացնել, որպեսզի վերջինս ազատ արձակի բոլոր հայ գերիներին։ Համաժողովին ընդառաջ բոլոր հայ գերիներին ազատ արձակելու կոչերով են հանդես եկել միջազգային տարբեր գործիչներ։