2 րոպեի ընթերցում
ԵՐԵՎԱՆ, 28 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանում գրանցված հանցագործությունների թիվը հունվար-սեպտեմբեր ամիսներին նվազել է 1413-ով:
«Արմենպրես»-ի հաղորդմամբ՝ այս մասին ասաց ՀՀ ներքին գործերի փոխնախարար Արփինե Սարգսյանն ԱԺ մշտական հանձնաժողովների համատեղ նիստում 2025 թվականի պետական բյուջեի մասին օրենքի նախագծի նախնական քննարկումներում:
«2024 թվականի առաջին 9 ամսվա հաշվարկով հանրապետությունում գրանցված հանցագործությունների ընդհանուր թվաքանակի նվազում ունենք, նվազել է 4.8 տոկոսով կամ 1413 դեպքով»,-ասաց Արփինե Սարգսյանը:
Փոխնախարարը նշեց, որ գրանցված 28 հազար 269 դեպքի հիմնական բաժինն ընկնում է ոչ մեծ և միջին ծանրության հանցագործություններին: Նա հավելեց՝ եթե հաշվի առնենք այս մասով ընդհանուր համաշխարհային պրակտիկան՝ ՀՀ-ն այս տեսանկյունից բավականին լավ դիրքերում է գտնվում, քանի որ ծանր և առանձնապես ծանր հանցագործությունների կշիռն ընդհանուր հանցավորության մակարդակի մեջ կազմում է շատ փոքր տոկոս:
Փոխնախարարը շեշտեց՝ սա չի նշանակում, թե ծանր և առանձնապես ծանր հանցագործությունների դեմ պայքարի շրջանակում անելիքներ ու գործողություններ դեռ չկան:
«Ընթացիկ տարում 331-ով նվազել է բոլորիս համար շատ մտահոգիչ համարվող ճանապարհատրանսպորտային պատահարները, 418 -ով նվազել է վիրավորների, 32-ով՝ զոհերի թիվը»,-նշեց Սարգսյանը: