ԵՄ դեսպանը կանչվել է Ադրբեջանի արտաքին գործերի նախարարություն

ԵՐԵՎԱՆ, 25 ՀՈԿՏԵՄԲԵՐԻ, ԱՐՄԵՆՊՐԵՍ։ Ադրբեջանում Եվրամիության դեսպան Պետեր Միխալկոն կանչվել է Ադրբեջանի արտաքին գործերի նախարարություն: «Արմենպրես»-ի փոխանցմամբ՝ այս մասին հաղորդագրություն է տարածել Ադրբեջանի արտաքին գերատեսչության մամուլի ծառայությունը։

Ադրբեջանական կողմը Միխալկոյին բողոքի նոտա է հանձնել Եվրոպական միության խորհրդարանի կողմից հոկտեմբերի 24-ին ընդունված Ադրբեջանի վերաբերյալ բանաձևի կապակցությամբ:

Հոկտեմբերի 24-ին Եվրոպական միության խորհրդարանը 453 կողմ, 31 դեմ և 89 ձեռնպահ ձայներով ընդունեց Ադրբեջանում իրավիճակի, մարդու իրավունքների ու միջազգային իրավունքի ոտնահարման և Հայաստանի հետ հարաբերությունների մասին բանաձևը։