Շոլցը Մոդիի հետ հանդիպմանը կոչ է արել արագացնել ԵՄ-ի և Հնդկաստանի միջև ազատ առևտրի համաձայնագիրը
2 րոպեի ընթերցում
ԵՐԵՎԱՆ, 25 ՀՈԿՏԵՄԲԵՐԻ, ԱՐՄԵՆՊՐԵՍ: Գերմանիայի կանցլեր Օլաֆ Շոլցը, որը եռօրյա այցով գտնվում է Նյու Դելիում, հանդես է եկել Եվրամիության և Հնդկաստանի միջև ազատ առևտրի համաձայնագրի շուրջ բանակցությունների արագ ավարտի օգտին: Այս մասին «Արմենպրես»-ը տեղեկանում է ՏԱՍՍ-ից։
Նյու Դելիում Հնդկաստանի վարչապետ Նարենդրա Մոդիի հետ համատեղ մամուլի ասուլիսում Շոլցը բանակցությունների «արագ առաջընթացի և արագ ավարտի» կոչ է արել:
«Եթե մենք միասին աշխատենք դրա վրա, վարչապե՛տ, ապա դա կարող է տեղի ունենալ ամիսներ անց, այլ ոչ թե տարիներ անց», - ասել է Գերմանիայի կանցլերը Հնդկաստանի վարչապետին:
Շոլցը և Գերմանիայի մի քանի նախարարներ գտնվում են Հնդկաստանում, որտեղ կմասնակցեն գերմանահնդկական յոթերորդ կառավարական խորհրդակցություններին։
ԵՄ-ն և Հնդկաստանը ազատ առևտրի համապարփակ համաձայնագրի շուրջ բանակցություններն սկսել են 2007 թվականին, սակայն 2013 թվականին դրանք դադարեցվել են՝ մտավոր սեփականության իրավունքների, ՏՏ հատվածի ընկերություններում տեղեկատվական անվտանգության և որոշակի ապրանքների, օրինակ՝ ավտոմեքենաների ընդհանուր շուկայում հասանելիության հարցերի շուրջ կողմերի միջև տարաձայնությունների պատճառով։
Բանակցությունները վերսկսվել են 2022 թվականին: ԵՄ-ն ցանկանում է, որ Հնդկաստանը վերացնի առևտրային խոչընդոտները փոքր ընկերությունների համար և բացի ծառայությունների և պետական գնումների շուկաները: Սակայն, նշում է ՏԱՍՍ-ը, Հնդկաստանը պաշտպանում է իր միկրո, փոքր և միջին ձեռնարկությունների շահերը, ինչպես նաև պաշտպանում է այնպիսի զգայուն ճյուղեր, ինչպիսիք են գյուղատնտեսությունն ու կաթնարդյունաբերությունը՝ հաշվի առնելով հնդիկ ֆերմերների վիճակը: