Ահաբեկչությունը ոչ մի արդարացում չունի. ՀՀ ԱԳՆ-ն անդրադարձել է Անկարայում տեղի ունեցած զինված հարձակմանը

ԵՐԵՎԱՆ, 23 ՀՈԿՏԵՄԲԵՐԻ, ԱՐՄԵՆՊՐԵՍ։ Հայաստանի Հանրապետության արտաքին գործերի նախարարությունն, անդրադառնալով Անկարայի ավիացիայի արտադրությամբ զբաղվող Tusaş ընկերության վրա տեղի ունեցած զինված հարձակմանը, հայտարարել է, որ Հայաստանը դեմ է ահաբեկչության ցանկացած ձևի դրսևորմանը և նման բռնի գործողություններին։

«Արմենպրես»-ի հաղորդմամբ՝ այս մասին նշված է ՀՀ ԱԳ նախարարության X-ի միկրոբլոգում կատարված գրառման մեջ։

«Ինչպես ցույց տվեց այսօր Անկարայում տեղի ունեցած հարձակումն, ահաբեկչության և անմեղ մարդկանց վնաս հասցնելու համար ոչ մի արդարացում գոյություն չունի։ Հայաստանն, ինչպես բազմիցս է արտահայտվել, դեմ է ահաբեկչության ցանկացած ձևի և նման բռնության գործողությունների», - նշված է գրառման մեջ։

As shown by today’s attack in #Ankara, no justification exists for terrorism & harming innocent people. Armenia, as expressed numerously, is against any form of terrorism & such acts of violence.@MFATurkiye

— MFA of Armenia🇦🇲 (@MFAofArmenia) October 23, 2024

Վերջին տվյալների համաձայն՝ Անկարայի ավիացիայի արտադրությամբ զբաղվող Tusaş ընկերության վրա տեղի ունեցած զինված հարձակման հետևանքով զոհերի թիվը հասել է չորսի, իսկ 14 վիրավորներից 3-ը գտնվում են ծանր վիճակում։